24/06/2026
ရိုနယ်ဒို: “မက်ဆီနဲ့ ကမ္ဘာ့ဖလားမှာ တွေ့ဆုံရမယ်ဆိုရင် အရမ်းမိုက်မှာပါ”
Cristiano Ronaldo သည် Lionel Messi အာဂျင်တီးနားအသင်းအတွက် ခြေစွမ်းပြခဲ့သည့်နေ့၏ နောက်တစ်နေ့တွင် ပေါ်တူဂီအသင်း၏ ဥဇဘက်ကစ္စတန်ကို ၅-၀ ဖြင့် အနိုင်ရရှိသော ပွဲ၌ ၂ ဂိုးသွင်းယူနိုင်ခဲ့သည်။
ရိုနယ်ဒိုက ၎င်း၏ အဓိကပြိုင်ဘက်ကြီး မက်ဆီနှင့် ကမ္ဘာ့ဖလားပြိုင်ပွဲတွင် ရင်ဆိုင်ရနိုင်သည့် အလားအလာကို “အရမ်းမိုက်မယ်” ဟု ဖော်ပြပြောဆိုခဲ့သည်။ ပေါ်တူဂီနှင့် အာဂျင်တီးနားတို့သည် နောက်ပိုင်းအဆင့်များတွင် တွေ့ဆုံနိုင်သည့် အခြေအနေရှိနေသည်။
ပေါ်တူဂီအသင်းသည် အင်္ဂါနေ့က ဥဇဘက်ကစ္စတန်ကို ၅-၀ ဖြင့် အနိုင်ရခဲ့ပြီး နောက်တစ်ဆင့်တက်ရောက်ရန် သေချာသလောက် ဖြစ်လာခဲ့သည်။ ထိုပွဲတွင် ရိုနယ်ဒိုက ပထမပိုင်း၌ ၂ ဂိုးသွင်းယူခဲ့သည်။
ယင်း ၂ ဂိုးကြောင့် ရိုနယ်ဒိုသည် ကမ္ဘာ့ဖလားပြိုင်ပွဲသမိုင်းတွင် ပေါ်တူဂီအသင်းအတွက် ၁၀ ဂိုးသွင်းယူထားသည့် အချိန်တိုင်း ဂိုးအများဆုံးကစားသမား ဖြစ်လာခဲ့ပြီး၊ ၉ ဂိုးသွင်းထားသော Eusebio ကို ကျော်တက်သွားခဲ့သည်။ ထို့အပြင် အသက် ၄၁ နှစ်ဖြင့် ကမ္ဘာ့ဖလားသမိုင်းတွင် ဒုတိယအသက်အကြီးဆုံး ဂိုးသွင်းသူအဖြစ်လည်း မှတ်တမ်းဝင်ခဲ့သည်။ ပထမနေရာတွင် ၁၉၉၄ ခုနှစ်က အသက် ၄၂ နှစ်အရွယ် Roger Milla ရှိနေသည်။
တစ်ဖက်တွင် ကိုလန်ဘီယာအသင်း သည် DR Congo ကို ၁-၀ ဖြင့် အနိုင်ရကာ အုပ်စု K ထိပ်ဆုံးနေရာနှင့် ရှုံးထွက်အဆင့်တက်ခွင့်ကို ရရှိထားပြီးဖြစ်သည်။
ပေါ်တူဂီအသင်းသည် အုပ်စုဗိုလ်ဖြစ်ရန် ကိုလံဘီယာကို အနိုင်ရရန် လိုအပ်နေသည်။ Opta Super computer ၏ ခန့်မှန်းချက်အရ ကိုလံဘီယာက အုပ်စုဗိုလ်ဖြစ်နိုင်ခြေ ၅၁ ရာခိုင်နှုန်းရှိပြီး ပေါ်တူဂီက ၄၉ ရာခိုင်နှုန်း ရှိနေသည်။
အကယ်၍ ပေါ်တူဂီအသင်း အုပ်စုဗိုလ်ဖြစ်ခဲ့ပါက ကွာတားဖိုင်နယ်အဆင့်တွင် အာဂျင်တီးနားနှင့် တွေ့ဆုံနိုင်ဖွယ် ရှိသည်။ အာဂျင်တီးနားအသင်းကတော့ မက်ဆီ၏ ပထမ ၂ ပွဲအတွင်း ၅ ဂိုးသွင်းစွမ်းဆောင်မှုကြောင့် အုပ် J ဗိုလ်အဖြစ် သေချာထားပြီးဖြစ်သည်။
ရိုနယ်ဒိုနှင့် မက်ဆီတို့သည် ကမ္ဘာ့ဖလားပြိုင်ပွဲတွင် ယခင်က တစ်ကြိမ်မျှ မတွေ့ဆုံဖူးကြသေးပေ။ ယခုနှစ်ပြိုင်ပွဲသည် နှစ်ဦးစလုံးအတွက် ၆ ကြိမ်မြောက်နှင့် နောက်ဆုံး ကမ္ဘာ့ဖလားဖြစ်နိုင်ဖွယ် ရှိနေသည်။
မက်ဆီနှင့် တွေ့ဆုံနိုင်ခြေကို မေးမြန်းရာ ရိုနယ်ဒိုက -
“ဘယ်လိုဖြေရမလဲ မသိဘူး။ ဒါပေမဲ့ အရမ်းမိုက်မှာပါ။”
ဟု ပြောကြားခဲ့သည်။
ထို့နောက် -
“ဒီနေ့အတွက် အရေးကြီးဆုံးက အနိုင်ရပြီး နောက်တစ်ဆင့်တက်ဖို့ပါပဲ။ နောက်လာမယ့်ပွဲအတွက် အဆင်သင့်ဖြစ်နေဖို့လည်း လိုပါတယ်။ အဓိကရည်မှန်းချက်က အုပ်စုအဆင့်ကို ကျော်ဖြတ်ဖို့ဖြစ်ပြီး ကျွန်တော်တို့ လုပ်နိုင်ခဲ့ပါတယ်။” ဟု ဆက်လက်ပြောဆိုခဲ့သည်။
သို့သော် မက်ဆီ၊ Kylian Mbappe နှင့် Erling Haaland တို့၏ ဂိုးသွင်းစွမ်းဆောင်ရည်များနှင့် ပတ်သက်၍ မေးမြန်းရာတွင် ရိုနယ်ဒိုက စိတ်မရှည်သလို တုံ့ပြန်ကာ “နောက်မေးခွန်းပါ” ဟုသာ ပြန်လည်ဖြေကြားခဲ့သည်။
အသက် ၄၁ နှစ်အရွယ် ရိုနယ်ဒိုသည် ပေါ်တူဂီအသင်း DR Congo နှင့် ၁-၁ သရေကျခဲ့သော အဖွင့်ပွဲစဉ်အပြီး ဝေဖန်မှုများစွာ ခံခဲ့ရသော်လည်း အသင်းအတွင်း စည်းလုံးမှုရှိနေကြောင်း အလေးပေးပြောကြားခဲ့သည်။
“အရေးကြီးဆုံးက အသင်းပါပဲ။ ကျွန်တော်တို့ အားလုံး စည်းစည်းလုံးလုံး ရှိနေကြပါတယ်။”
“အပြင်က ဘာတွေဖြစ်နေတယ်ဆိုတာကို ကျွန်တော်တို့ မထိန်းချုပ်နိုင်ပါဘူး။ နိုင်ပွဲမရတဲ့အခါ ဝေဖန်ခံရမယ်ဆိုတာ သိပါတယ်။ အထူးသဖြင့် ကျွန်တော့်ကိုပါ။” ဟု ရိုနယ်ဒိုက ပြောကြားခဲ့သည်။
