21/05/2026
#خاص بصرفية الوقود Fuel dispensing هو انا ليه عربيتي بتصرف .. طيب الطبيعي شنو والما طبيعي شنو عايز اتاكد عربيتي مافيها صرف وقود !!
ح اعرف كيف ي برو 🤔 ؟
انا ح اوريك وان شاء الله م ح اطول ليك في سرد القصص وم ح اسرح في الكتابة زي كل مرة 😁🧡
تم.. ايوه تم ✅
عاين في اسباب كثيرة بتخلي محرك عربيتك يصرف بنزين اكتر من النسب الطبيعية لكن نجي نمسك الموضوع من ساسو
اغلب العربات التجارية الموجودة في السوق ال full tank مصمم ياخد ليك كمية وقود تمشي العربية في رينج 500km ( 310 miles)
ده الطبيعي كده يا باشا يعني لو ال full بوديك اقل من كده عندك مشكلة ولا زم تعالجا ولو بوديك 200 لي 250 الحق نفسك انت في خطر قد الجيب 😔
تقوم تجينا عوامل الطريق يا استاذ والظروف القياسية جو غبار ، كتاحات ، طرق غير معبدة ، زحمة مرورية ، اساليب القيادة... الخ دي ممكن تنقص ليك المسافة لي حدود ال 450km للفل تانك
لوكبيت وقود اوكتان منخفض ولا عندك رواسب في التنك او مصفي وقود مقفل ح يحصل عدم انسياب طبيعي للوقود
لو عندك زرقنة في اللساتك خاص بنظام الفرامل المكنة ح تطلب وقود اكتر عشان تعوض قوة الشد حقت الفرامل
القير الاوتو لو فيهو مشاكل تعليق نمر اثناء السواقة ح تزيد عندك فرص ضخ بنزين اكتر عشان الكمبيوتر يقدر يلائم ظروف القيادة الجديدة دي
فلتر الهواء والثروتل وال map sensor لو في وسخ عليهم افضل تنظفهم عشان م تدخل في بلوف كمان اتوسخت ومواضيع اكبر..
كل الذكرتو ليك فوق ده تمام ومافي كلام 😌🔥.. امسك في الاسباب الشائعة لزيادة صرفية الوقود الخصهم ليك :
- الثيرموستات اتكلمنا فيهو اكتر من مرة لكن باختصار لو لاغي ثيرموستات ارجع اخد واحد جديد اصلي عشان ده مهمته يحافظ ليك علي درجة حراراة التشغيل المثالية للمحرك..
بدونه المكنة ح توصل لي درجة الحرارة دي بي صعوبة بالغة والمحرك ح يشتغل فترة طويلة وهو بارد وبالتالي اشتعال غير متكافئ..
- البخاخات لو تعبانة ح تبخ بنزين بصورة عشوائية جدا وده ام الصرف زاتو 😂💔 ، ح تلاحظ رجة في المحرك واحيانا دخان اسود كثيف يخرج من العادم والتسارع ح يبقي معدوم..
- البلكات لو ما اصلية او اشتغلت فترة طويلة لامن شمعاتها انتهت كمان ح توزع الشرارة بصورة عشوائية داخل غرف الاحتراق او م يعرف بظاهرة الصفع knocking وح يظهر معاك بشكل واضح اثنا القيادة..
- الكانستر ده يا اخونا حقو براهو لانو ده تابع لي نظام كامل مفترض نخصص ليهو بوست منفصل .. لكن بي بساطة لو عندك مشكلة في نظام تبخير البنزين ح يكون عندك صرف وقود وعموما ح يظهر مع فحص الكمبيوتر..
- حساسات الاكسجين كمان لو في فيهم مشكلة هيتراتهم ضاربة ولا قراياتهم البرسلوها لكمبيوتر العربية مغلوطة الكمبيوتر ح يرسل اوامر للبخاخات تضخ بنزين علي حسب البيانات الواصلاهو من السنسرات دي
قرت حريق فقير ولا غني الكمبيوتر ح يرسل للبخاخات انو تزيد او تنقص كمية البنزين علي حسب كمية الاكسجين البتقراها السنسرات دي..
- دبة التلوث لو قافلة ح يكون في كتمة ظاهرة واحيانا في حرارة ح تتصرف لي جوا القبين ح تحس بيها تحت رجلك.. لو ملغية ح يكون عندك نسبة صرف دايم ولمبة check ح تنوور الا تركب علبة كاملة..
دي اكتر 6 اسباب شائعة بتعمل ليك صرفية وقود في عربيتك يا متابع يا جميل لو عندك مشكلة في واحدة من ديل معناها عندك صرف وقود
كيف تتاكد .. تعمل فحص كمبيوتر اول وتشخص اعطالك عند ورش متخصصة 👍
كيف تقيس.. صفر عداد ال trip املا خزانك وعدي مشاوريك عادي لامن اللمبة تولع شوف ودتك كم كيلو
ضيف للقياسات دي فترة العربية وهي واقفة ومدورة تقريبا معظم العربات ال 4 سلندر بتصرف حوالي 1.2 لتر وقود لكل ساعة والعربية واقفة م متحركة لو تكييف شغال ح تزيد بنسبة قليلة ..
الفيصل هو كتلوج سيارتك او كمان ممكن بأي فيشة فحص كمبيوتر بظهر ليك كمية ضخ الوقود لكل ساعة عمل والعربية واقفة ✅
تابعنا عشان يصلك كل جديد في وشروحات
