22/06/2024
Гайхуулах ч юм алга даа бидэнд
Гар утас шигээ нимгэрсэн хүн чанартайгаа
Галзуугийн өвчтөн шиг улстөрчидтэйгээ
би гэсэн бэртэгчин бодолтойгоо
Хоёр дахь мянганы хорьдугаар он руу
Хордсон үрстэйгээ гандсан төрхтэйгөө алхан орлоо
Азотын хий дүүрсэн дөрвөн уулынхаа дунд
Агуу ихээ гайхацгаан цээжээ дэлдэх зуур минь
Араа шүдээ хавирсан харийн ноход
Аль хэдийн хотонд минь оржээ
Анзаарах сөхөө алга уу
Эртний Миссирийн хүлцэнгүй боолын гунигт харцаар
Ирээдүйгээ ширтэх гурван сая монгол оо
Ядарсан ард бөхийж
Ямаан дээдэс гэдийж
Өтгөс минь өлсөж
Цэцгэс минь гундаж
Залуус минь дүрвэж
Зүрх минь даарч байна
Хүүхдүүд минь уйлж
Хүүxнүүд минь шаналж
Эрчүүд минь архидаж
Эх орон минь эзгүйдэх дор
Сүүлчийн хөсгөө хүлээх эмгэн лугаа адил
Сүүтийж суугаад эх орноо алдах уу
Сүмийн буланд хоргодсон
Гэлэн лугаа адил
Сүүмийж зогсоод ирээдуйгээ баллах уу
Шилний цаадах диваажинг
Ширтэж суугаад ханав уу
Ширэн нүүртэй урвагчдаа
Ширвэж орхиод мордох уу
Гурван морний эргээс хүлгийн дөрөө жийж
Гуниг зовлонгийн цоожийг тасар татан шидсэн
Цуутай монголын урс бид
Дуутай босох цаг иржээ
Дэлүүн болдогийн зүгээс
Дээдсийн сүнс сэрж байна
Халхын их талаас
Хаадын сүнс харж байна
Баруун уулсын орноос
Баатруудын сүнс ширвэж байна
Ялгуусан дууллын эзэд бид
Ядуу амьрах ёсгүй ээ
Барласан бурхад шиг дээдэс ээ
Дарласан буг шиг даврахгуй шүү
Асарч тэтгэж чадвал ард тумэн чинь
Алаг бяруу шиг номхон шүү
Аман дахь хоолыг нь булаавал харин
Асар басар шиг тасдана шүү
Зүдэргээнт он жилуудэд
Зүгээр ч нэг олдоогуй эрх чолоогоо
Зоосны донтой та нараар
Зоргоор чинь тоглуулахгүй шүү
Зовсон түмний занал гэдэг
Цусны хариутай байдаг шүү
Цөлийн чоно шиг омголон
Цөс ихтэй эрс ээ
Чи монгол юм бол
Чингис богдын урс юм бол
Та монгол юм бол
Талын баатруудын удам юм бол
Амьсгалах агааргүй багтарч яваа
Ангаахай үрсийнхээ төлөө
Эх нутгийг минь эмтэлсэн
Эмс охидыг минь эзэмдсэн
Холын нохдыг хөөж явуулая
Хотны банхараа ч таниж авъя
Чоно дагасан жингэрүүдийг
Цөм цохиж нам даръя
Ганхсан торийнхоо алтан баганыг
Гар гараараа тулан тал талаас нь босгое
Алдвал олдохгүй эрх чөлөөгөө
Ухвал ургахгүй эх нутгаа
Гарвал орохгүй эд баялгаа
Гарцаагүй хамгаалая яг одоо
Цаашаа цаг гэж үгуй
Наашаа найраа гэж үгуй
Энэ цагт бид элгээ эвхвэл
Ирэх цагт хилээ эвхнэ ээ..
МЗЭ-ийн гишүүн, Сэр-Одын шагналт яруу найрагч Наваанжамбын Мөнхсайхан
Har Has MC
