16/05/2024
ဆီကားတွေထက် ရိုးရှင်းတဲ့ လျှပ်စစ်ကား
လျှပ်စစ်ကားဆိုတာနဲ့ လူအများစုက အထူးအဆန်းကြီးထင်နေကြပါတယ်။ တကယ်တမ်း လျှပ်စစ်ကားဆိုတာ ပုံမှန် ဆီကားတွေ နဲ့ ကွာခြားမှု ကြီးကြီးမားမားမရှိပါဘူး။
ကွဲပြားမှုများ
၁။ အစိတ်အပိုင်းများစွာပါဝင်တဲ့ အင်ဂျင်၊ ဂီယာ နဲ့ အိပ်ဇောစနစ်တွေ အစား ရိုးရှင်းတဲ့မော်တာကို အသုံးပြုထားပါတယ်။
၂။ ဆီတိုင်ကီအစား ဘက်ထရီကို အသုံပြုထားပါတယ်။
တူညီမှုများ
၁။ မော်တာနဲ့ဘက်ထရီအတွက် အအေးခံစနစ်ကို ဆီအင်ဂျင်ကားတွေမှာပါတဲ့ အအေးခံစနစ်အတိုင်း liquid cooling အသုံးပြုထားပါတယ်။
၂။ ကား ကွန်ပြူတာအပါ အခြားလျှပ်စစ်ပိုင်းဆိုင်ရာများကို 12V ဘက်ထရီနဲ့ အလုပ်လုပ်ပါတယ်။
၃။ အဲယားကွန်းကို မော်တာ ကွန်ပရက်စာ နဲ့ လည်ပတ်စေပါတယ်။
၄။ Suspension စနစ်တွေက ဆီကားနဲ့ တူတူပါပဲ။
၅။ ဘရိတ်စနစ် စနစ်တွေက ဆီကားတဲ့ ဆင်တူပါတယ်။
အားသွင်းပုံ
မြန်မာပြည်မှာ အများဆုံးသုံးနေတာ (၃ ယူနစ်စက်) ၊ (၇ ယူနစ်စက်) နဲ့ (၆၀ ယူနစ်စက်) ၃ မျိုးသာရှိပါတယ်။ မှတ်ချက် - level 1, 2, 3 ဆိုတာ အမေရိကန်ရဲ့ 110V စနစ်ကိုအခြေခံပြီးပြောတာဖြစ်လို့ 220V စနစ်သုံးတဲ့ မြန်မာနိုင်ငံအတွက် အသုံးမတည့်ပါဘူး။ အားသွင်းစက်တွေအကြောင်းပြောရင် ယူနစ်ကို အခြေခံပြီး ပြောမှ တိကျမှန်ကန်မှုရှိပါမယ်။
၁။ (၃ ယူနစ်စက်) အလွယ်တကူသယ်ယူလို့ရတဲ့အားသွင်းစက်တွေထဲမှာ 3KW AC Charger တွေများပါတယ်။ NETA V ရဲ့ ၄၀ ယူနစ်ဘက်ထရီကို (၃ ယူနစ်စက်) နဲ့ အားသွင်းရင် ၁ နာရီကို ၃ ယူနစ် အားဝင်လို့ အားပြည့်ဖို့ ၁၃ နာရီ ခန့် ကြာပါမယ်။ တစ်နည်းအားဖြင့် ၁ ယူနစ်အားဝင်ဖို့ ၂၀ မိနစ်ခန့်ကြာပါမယ်။
၂။ (၇ ယူနစ်စက်) အိမ်မှာအထိုင်တပ်သုံးရတဲ့အားသွင်းစက်တွေထဲမှာ 7KW AC Charger တွေကို အများဆုံးသုံးထား ပါတယ်။ မြန်မာနိုင်ငံရောက်နေတဲ့ လျှပ်စစ်ကားအများစုက 7KW AC ထိပဲလက်ခံနိုင်ပြီး MG နဲ့ KIA ကားတွေမှာ 11KW AC လက်ခံနိုင်တာတွေရှိပါတယ်။ NETA V ရဲ့ ၄၀ ယူနစ်ဘက်ထရီကို (၇ ယူနစ်စက်) နဲ့ အားသွင်းရင် ၁ နာရီကို ၇ ယူနစ် အားဝင်လို့ အားပြည့်ဖို့ ၆ နာရီ ခန့် ကြာပါမယ်။ တစ်နည်းအားဖြင့် ၁ ယူနစ်အား ဝင်ဖို့ ၉ မိနစ်ခန့် ကြာပါမယ်။
(၇ ယူနစ်စက်) တွေက အသုံးအများဆုံးဖြစ်နေတဲ့အချက်တွေက အိမ်မှာ အလွယ်တကူတပ်ထားလို့ရတဲ့အပြင် ကားကို ၁ နာရီကြာအားသွင်းပြီး ၁ နာရီ မောင်းလို့ရတဲ့အတွက် အံကိုက်ဖြစ်နေလို့ ဖြစ်ပါတယ်။
၃။ (၆၀ ယူနစ်စက်) Charging Stations အားသွင်းဆိုင်မှာတပ်ထားတဲ့ အားသွင်းစက်တွေမှာ 60KW DC Charger တွေ အသုံးများပါတယ်။ (၁၈၀ ယူနစ်စက်) တွေလည်း ရန်ကုန်-မန္တလေး Highway နေရာတစ်ချို့မှာ တပ်ထားပါပြီ။ နိုင်ငံခြားမှာ (၃၅၀ ယူနစ်စက်) တွေထိပါ အသုံးပြုနေကြပါပြီ။ NETA V ရဲ့ ၄၀ ယူနစ်ဘက်ထရီကို (၆၀ ယူနစ်စက်) နဲ့ အားသွင်းရင် ၁ နာရီကို ၆၀ ယူနစ် အားဝင်လို့ အားပြည့်ဖို့ ၄၀ မိနစ် ခန့် ကြာပါမယ်။ တစ်နည်းအားဖြင့် ၁ ယူနစ်အား ဝင်ဖို့ ၁ မိနစ်ခန့် ကြာပါမယ်။
(၆၀ ယူနစ်စက်) DC Charger တွေနဲ့ အားသွင်းတဲ့အခါ သတိထားရမယ့် အချက်က အား ၈၀% ကျော်ဝင်ပြီးရင် အားသွင်းမှုနှုန်းက လျှော့ကျသွားပါတယ်။ ဆီကားများနည်းတူ ဆီတိုင်ကီထဲဆီပြည့်ခါနီး အရှိန်မလျော့ပဲ ဆက်ထည့်ရင် လျှံကျနိုင်သလို ဘက်ထရီလည်း အားပြည့်ခါနီး အားအပြည့်နဲ့ဆက်သွင်းရင် ဘက်ထရီပျက်စီး နိုင်တဲ့အတွက် အလိုအလျှောက်ဓာတ်အားထိန်း စနစ်တွေက အားဝင်မှုကို လျှော့ချပေးထားပါတယ်။
နောက်ထပ်သတိထားရမှာက ကားကြော်ငြာတွေမှာ 0-80% ကို ၃၀ မိနစ် အားသွင်းနိုင်တယ်ဆိုတာ လွဲချော်မှုများစွာရှိနိုင်ပါတယ်။ ကြော်ငြာတဲ့ထဲမှာ အားသွင်းစက်က (၆၀ ယူနစ်စက်) လား (၁၈၀ ယူနစ်စက်) လားဆိုတာ ဖော်ပြထားခြင်းမရှိပါပဲ ကြော်ငြာထားတဲ့ကားက အများဆုံးလက်ခံနိုင်တဲ့ ယူနစ်နဲ့တွက်ပေးထားလို့ပါ။ ဒါကြောင့် မြန်မာပြည်မှာ အများဆုံးသုံးနေတဲ့ (၆၀ ယူနစ်စက်) နဲ့အားသွင်းရင် ၁ ယူနစ်အားဝင်ဖို့ ၁ မိနစ်သာ ကြာမှာဖြစ်လို့ ဘက်ထရီရဲ့ယူနစ် ပေါ်မူတည်ပြီး အချိန်တွက်ချက်မှ ပိုမိုတိကျတဲ့ အဖြေရနိုင်ပါမယ်။
လျှပ်စစ်စားနှုန်းနှင့် ကုန်ကျစရိတ်
ဆီကားမှာ ကားကြီးရင် အင်ဂျင်ကြီးပြီး ဆီပိုစားလို့ ဆီတိုင်ကီပိုကြီးတာတပ်ထားသလို လျှပ်စစ်ကားမှာလည်း ကားကြီးရင် မော်တာပိုကြီးပြီး ဘက်ထရီပိုကြီးတာ ထည့်ပေးထားပါတယ်။ ဆီကားအတွက် ဆီ ၁ လီတာ ကို ၁၀ ကီလိုမီတာ သွားနိုင်ရင် အရွယ်အစားတူ လျှပ်စစ်ကားက လျှပ်စစ်မီး ၁ ယူနစ်ကို ၁၀ ကီလိုမီတာ သွားနိုင်ပါတယ်။
ဥပမာ -
Suzuki Ciaz (ဓာတ်ဆီ ၄၀ လီတာ) 400km ခရီးကုန်ကျစရိတ် - ၁၂၀,၀၀၀ ကျပ်
NETA V (ဘက်ထရီ ၄၀ ယူနစ်) 400km ခရီးကုန်ကျစရိတ် - ၄,၈၀၀ ကျပ်
Credit: EV NET
