17/07/2026
တိုက်ဆိုင် လိုက်တာများကွာ
ယူနီဆက်ဖ် ရန်ပုံငွေ ဓာတ်ပုံမှသည် ကမ္ဘာ့ဖလား ဗိုလ်လုပွဲဆီသို့
ဧရာဝတီ၊ ဇူလိုင် ၁၇၊ ၂၀၂၆
လာမယ့် တနင်္ဂနွေနေ့မှာ ကစားမယ့် ၂၀၂၆ ကမ္ဘာ့ဖလား ဗိုလ်လုပွဲမှာ အာဂျင်တီးနားအသင်းနဲ့ စပိန်အသင်းတို့ ရင်ဆိုင်ဖို့ ပြင်ဆင်နေချိန်မှာပဲ၊ လွန်ခဲ့တဲ့ ၁၉ နှစ် (၂၀၀၇ ခုနှစ်) က ရိုက်ကူးခဲ့တဲ့ အာဂျင်တီးနား ဂန္ထဝင်ဘောလုံးသမား လီယွန်နယ် မက်ဆီနဲ့ စပိန်ကြယ်ပွင့် လမိုင်းယာမယ်တို့ရဲ့ ဓာတ်ပုံဟောင်းတွေက အွန်လိုင်းပေါ်မှာ ပြန်လည်ရေပန်းစားလာပြီး ပရိသတ်တွေကြားမှာ ဘောလုံးလောကရဲ့ အလှပဆုံး တိုက်ဆိုင်မှုအဖြစ် ပြောစမှတ်ပြုနေကြပါတယ်။
အဆိုပါ ဓာတ်ပုံတွေကို ဘာစီလိုနာအသင်းရဲ့ အဝတ်လဲခန်းထဲမှာ ရိုက်ကူးခဲ့တာ ဖြစ်ပါတယ်။ ထိုစဉ်က အသက် ၂၀ အရွယ် ရှက်တတ်တဲ့ မက်ဆီဟာ ကံစမ်းမဲပေါက်လို့ ရောက်လာတဲ့ အလုပ်သမားလူတန်းစား မိသားစုက မွေးဖွားလာတဲ့ ၅ လသားအရွယ် ကလေးငယ် လမိုင်းယာမယ်ကို ရေချိုးပေးပြီး ပွေ့ချီခဲ့ရတာပါ။ ယူနီဆက်ဖ် (UNICEF) ရန်ပုံငွေပွဲအတွက် ဓာတ်ပုံရိုက်ကူးပေးခဲ့ရတဲ့ ဓာတ်ပုံဆရာ ဂျိုအန် မွန့်ဖို့တ် (Joan Monfort) က "ဒါဟာ တကယ့်ကို ကံကြမ္မာရဲ့ အံ့ဖွယ်တိုက်ဆိုင်မှုပါပဲ။ ရုပ်ရှင်ထဲမှာတောင် မဖြစ်နိုင်ဘူးလို့ ထင်ရမယ့်အရာပါ" လို့ ဆိုပါတယ်။
ဒီဓာတ်ပုံတွေဟာ နှစ်ပေါင်း ၁၆ နှစ်ကျော်ကြာအောင် လူမေ့ သတိမထားမိဘဲ ရှိနေခဲ့တာပါ။
ဒါပေမဲ့ ယူရို ၂၀၂၄ ပြိုင်ပွဲအတွင်း ယာမယ်ရဲ့ဖခင်ဖြစ်သူ မိုနီယာ နာဆရာဝီ (Mounir Nasraoui) က အဲဒီဓာတ်ပုံတွေထဲက တပုံကို လူမှုကွန်ရက်ပေါ်မှာ "ဂန္ထဝင် ဘောလုံးသမားနှစ်ဦးရဲ့ အစပြုခြင်း" ဆိုတဲ့ စာသားနဲ့အတူ မျှဝေခဲ့ရာကနေ အခြေအနေတွေ ပြောင်းလဲသွားခဲ့ပါတယ်။
အင်တာနက် အသုံးပြုသူတွေကြားမှာ ဒီဓာတ်ပုံဟာ လျင်မြန်စွာ ရေပန်းစားသွားခဲ့ပါတယ်။
အဲဒီနောက်မှာတော့ ရန်ပုံငွေ အစီအစဉ်အတွင်း ရိုက်ကူးခဲ့တဲ့ အခြားဓာတ်ပုံတွေပါ ထပ်မံထွက်ပေါ်လာခဲ့ပြီး၊ အဲဒီအထဲမှာ ယာမယ်ရဲ့မိခင် ရှီလာ အီဘာနာ (Sheila Ebana) က ကူညီပေးနေစဉ် မက်ဆီက ယာမယ်လေးကို ရေချိုးတဘက်နဲ့ ပွေ့ချီထားတဲ့ ပုံတွေလည်း ပါဝင်ပါတယ်။
စပိန်အသင်းဟာ တနင်္ဂနွေနေ့ ကမ္ဘာ့ဖလားဗိုလ်လုပွဲကို တက်ရောက်နိုင်ခဲ့ပြီးနောက်မှာ ဒီကျော်ကြားတဲ့ ဓာတ်ပုံကို ပြသတဲ့အခါ ယာမယ်က ပြုံးလျက် "ဗိုလ်လုပွဲမှာ သူ့ကို ရင်ဆိုင်ခွင့်ရဖို့ မျှော်လင့်ပါတယ်" လို့ ပြောကြားခဲ့ပါတယ်။
လက်ရှိမှာ မက်ဆီက အသက် ၃၉ နှစ်၊ ယာမယ်က ၁၉ နှစ် ရှိပြီဖြစ်ပါတယ်။ လမိုင်းယာမယ်ဟာ မကြာသေးခင်ကမှ ၁၉ နှစ် ပြည့်ခဲ့ပေမဲ့ ယူရို ၂၀၂၄ ချန်ပီယံဆု၊ လာလီဂါ ၃ ကြိမ်နဲ့ ကိုပါဒယ်ရေး ဖလား ၁ ကြိမ်တို့ကို ဆွတ်ခူးထားပြီးဖြစ်ကာ သွင်းဂိုး ၅၆ ဂိုးအထိ ရရှိထားပြီး ဖြစ်ပါတယ်။
နှလုံးသား နှစ်ခြမ်းကွဲနေရတဲ့ ဓာတ်ပုံဆရာ
ဘာစီလိုနာ ပရိသတ်တဦးဖြစ်တဲ့ ဓာတ်ပုံဆရာ မွန့်ဖို့တ်ကတော့ ခုလို ဗိုလ်လုပွဲမှာ သူတို့နှစ်ယောက် ပြန်လည်ဆုံတွေ့တာဟာ ဇာတ်လမ်းရဲ့ အလှပဆုံး နိဂုံးတခုဖြစ်တယ်လို့ ဆိုပါတယ်။ "ကျနော့် နှလုံးသားကတော့ နှစ်ခြမ်းကွဲနေပါတယ်။ မက်ဆီကိုလည်း သူ့ရဲ့ ကစားသမားဘဝ နောက်ဆုံးအချိန်မှာ ဒုတိယအကြိမ် ကမ္ဘာ့ဖလား ရစေချင်သလို၊ စပိန်နဲ့ လမိုင်းယာမယ်တို့ နိုင်သွားရင်လည်း အရမ်းတန်ဖိုးရှိတဲ့ အောင်ပွဲဖြစ်မှာပါ" လို့ ၎င်းက ပြောကြားခဲ့ပါတယ်။
ကိုးကား။ ။ BBC သတင်း 'A true miracle of destiny' - Messi and Lamine Yamal's incredible first meeting
ပုံစာ - လွန်ခဲ့တဲ့ ၁၉ နှစ် (၂၀၀၇ ခုနှစ်) က ရိုက်ကူးခဲ့တဲ့ လီယွန်နယ် မက်ဆီနဲ့ လမိုင်းယာမယ်တို့ ဓာတ်ပုံ/Joan Monfort
