26/08/2026
शिवसेनेच्या (उद्धव बाळासाहेब ठाकरे) आंदोलनाच्या इशाऱ्यानंतर प्रशासनाला जाग; पुण्यतिथीच्या दिवशीच उद्यानाचे टाळे उघडले
डोंबिवली एमआयडीसी निवासी भागातील कल्याण डोंबिवली महापालिकेचे धर्मवीर आनंद दिघे साहेब उद्यान हे मागील दीड वर्षांपासून नियमित सकाळ, संध्याकाळ उघडले जात नव्हते. याचे मुख्य कारण की या उद्यानावर असलेला कंत्राटी सुरक्षा रक्षक ठेकेदाराचा ठेका संपलेला होता. नवीन ठेकदाराची नेमणूक न झाल्याने व त्यामुळे सुरक्षा रक्षक नसल्याने हे उद्यान नियमित उघडले जात नव्हते. यामुळे ज्येष्ठ नागरिक, बालगोपाल मंडळी यांचा हिरमोड झाला होता. यामुळे उद्यानात असलेले ओपन जिम, लहान मुलांची खेळणी, जॉगिंग ट्रॅक, लहान मोठी झाडे यांची देखभाल होताना दिसत नव्हती. वरील उपरोक्त बाबी या कल्याण डोंबिवली महापालिकेचे आयुक्त आणि उद्यान विभाग आणि लोकप्रतिनिधींना वारंवार सांगितल्या जात होत्या.परंतु यावर योग्य अशी कार्यवाही होताना दिसत नव्हती. शेवटी त्यामुळे शिवसेना (उद्धव बाळासाहेब ठाकरे) एमआयडीसी शाखेने धर्मवीर आनंद दिघे यांच्या २६ व्या पुण्यतिथी निमित्ताने बुधवार २६ तारखेला याच उद्यानाच्या प्रवेशद्वारावर धर्मवीर आनंद दिघे याना श्रद्धांजली वाहून आंदोलन करण्याचा इशारा दिला होता. या संदर्भातील सर्व बातम्या यापूर्वी माध्यमांत आल्या होत्या. परंतु केडीएमसीने तत्परतेने कार्यवाही करून आज सकाळी महाराष्ट्र सिक्युरिटी फोर्स यांचा एक सुरक्षा रक्षक पाठवून हे उद्यान उघडले आहे. शिवाय या उद्यानात आता वाढलेली झाडी झुडपी काढण्याचे व साफसफाई करण्याचे काम चालू करण्यात आले आहे. सदर हे उद्यान उघडल्याने आणि सुरक्षा रक्षक, साफसफाई सुरू झाल्याने शिवसेना (उद्धव बाळासाहेब ठाकरे) पक्षातर्फे होणारे आंदोलन हे धर्मवीर आनंद दिघे याना श्रद्धांजली वाहून स्थगित करण्यात आले आहे असे माजी नगरसेवक भालचंद्र म्हात्रे, माजी विभाग प्रमुख राजू नलावडे, उपविभाग प्रमुख मंदार स्वर्गे, शाखाप्रमुख सागर पाटील यांनी सांगितले आहे
#धर्मवीरआनंददिघे #आनंददिघे #डोंबिवली #डोंबिवलीन्यूज #केडीएमसी #धर्मवीरआनंददिघेउद्यान #शिवसेना #उद्धवबाळासाहेबठाकरे #शिवसेनाआंदोलन #उद्यान #ठाणेन्यूज #कल्याणडोंबिवली
