04/11/2025
O Concello de Ourense anuncia a programación completa e detallada do tradicional Magosto que terá lugar o vindeiro martes, día 11 de novembro de 2025, transformando a Praza Maior, a Praza Bispo Cesáreo e a rúa do Progreso (Alameda) no epicentro da festa.
A festa, que comeza ás 18.00 horas, estenderase até a noite e combinará a tradición gastronómica cunha potente oferta musical para todos os públicos.
A parte máis esperada da celebración, o Magosto tradicional, arrincará ás 18.00 horas simultaneamente na Praza Maior e na rúa do Progreso (Alameda). As persoas asistentes poderán degustar castañas asadas de forma gratuíta, honrando a esencia desta festa ancestral.
Ademais, haberá unha zona de venda de chourizo asado con bolo de masa nai, auga ou viño (por un prezo simbólico de 3€), xunto con outras propostas como callos e porco ao espeto.
Música Galega e Gran Verbena
A programación musical garante a animación da tarde e da noite:
18.00 a 19.30 h – Música Tradicional na Praza Maior. A festa comezará co concerto de Brañas Folk que estará acompañado de Verónica Codesal, Pancho Álvarez, María Jorge e polo grupo de gaiteiros "De pé feito", coordinados por Gonzalo Abelairas.
19.00 a 22.00 h – Baile e Festa na rúa do Progreso (Alameda): A verbena correrá a cargo da recoñecida Orquestra Olympus, que garantirá o baile e a diversión co seu espectáculo, poñendo o broche de ouro á noite do San Martiño.
