16/12/2019
عقلك هو مفتاح نجاحك أو فشلك
أحيانا بنصنع لنفسنا حواجز وعوائق مش بتبقى موجودة غير في عقلنا وبس، وهي اللي بتخلينا مش قادرين نكمل رحلة نجاحنا أو حتى نبدأها من الأصل، نجاحك كرائد أعمال أو موظف في شركتك مش هايجي إلا لما تبقى قادر على إنك تعيد برمجة عقلك وتفكيرك، بحيث تبعد كل الأفكار السلبية اللي بتخليك مش قادر تفكر بوضوح وتخلق حياة مهنية ناجحة.
النجاح بيتطلب إن ذهنك يبقى دايما يبقى صافي وأهدافك واضحة، يعني عمرك سألت نفسك انت ليه مش ناجح؟ ليه مش عارف تتقدم في شغلك والبيزنس بتاعك؟ الإجابة هي: عقلك.
رواد الأعمال بيقودوا الأفراد وبينتجوا أفكار عظيمة بيحولوها لشركات ناجحة ولكن في بعض الأحيان في أفكار ومشاعر بتحبطنا وتخلينا مش قادرين نكمل وننجح ومنها مثلا:
• الخوف: لو كان الخوف من الفشل هو اللي بيمنعك تكون شخص أفضل من اللي انت عليه، حدد الحاجة اللي انت خايف منها وتصور أسوأ وأفضل حاجة ممكن تحصل، إنت مش هتنجح إلا لما تكون فشلت في لحظة من اللحظات، وأحيانا مواجهة الخوف والتغلب عليه بيبقى أفضل حاجة ممكن تعملها لو في لحظة حسيت بالفشل.
• عدم الثقة بالنفس: والتقليل من قدراتك، بمعنى أدق إنك متبقاش عارف قيمة نفسك كويس.
• النرجسية: وهي حب الذات المبالغ فيه وإلي ممكن يخليك مش قادر تتقبل أي تعليق أو نقد لشغلك، النجاح بيعني إنك تكون مرن وقادر تتغير، ولو كان كل حاجة بتعملها شايفها صح ومش مهم رأى أي حد، تأكد إنك عمرك ما هتنجح.
• التجارب السلبية: ساعات لما بنعمل حاجة وتفشل، بيتحول الأمر لعقدة نفسية وعمرنا ما بنعرف نتغلب عليها، الحقيقة إنك لازم تقنع نفسك إن أي تجربة هي فرصة ليك عشان تتعلم ازاي تنجح بعد كده.
• الحساسية المبالغ فيها: من أي حاجة ممكن تتقالك أو تاخدها بشكل شخصي وده هيخليك مش قادر تبني علاقات ناجحة مع زملاؤك والناس اللي حواليك.
انت مش هتتحرر من كل الحواجز دي بسهولة، ولكن هتحتاج خطوات تساعدك عشان تعرف تستخدم كل إمكاناتك وقدراتك اللي مش قادر تستغلها، والخطوات دي ممكن نلخصها في النقط اللي جاية:
• تخلص من مخاوفك: في ناس الخوف بيسيطر عليهم لدرجة إنهم بيخافوا أصلا إنهم ينجحوا، حاول تفكر مع نفسك انت خايف ليه ومن إيه؟ الفشل عمره ما هيضرك ولا يقتلك، لكن خوفك هو اللي هيأذيك وهيوقفك، وعشان تتطور اعمل الحاجة اللي انت خايف منها واقنع نفسك دايما إنك تقدر تواجه أي شيء ولو غلطت قادر تتعلم من أخطائك.
• استغل الشك كدافع ليك: حوّل الشك لشيء إيجابي، لأن الشكوك دي معناها إنك بدأت تخرج من الكمفورت زون بتاعتك، فاستغلها وحولها لدافع تقدر تعدي بيه الحدود اللي حاصر نفسك وسطها.
• شخص ناصح ليك: انت محتاج يكون في حياتك شخص يرشدك ويديك نصايح في مجالك ويوجهك للاتجاه الصح، ويساعدك تتجنب الوقوع في الخطأ، الشخص ده ممكن يبقى مديرك في الشغل أو موظف أقدم منك، أو شريكك في البيزنس بتاعك.
• إدارة وقتك: كل الناس عندها نفس الـ 24 ساعة في اليوم ونفس عدد الأيام في السنة، ولما تحاول تحسن وضعك الوظيفي أو تبدأ مشروع جديد أكيد هتحتاج وقت، عشان كده اوعى تاخد موضوع إن مفيش وقت حجة تبرر لنفسك بيها عدم تحقيق أحلامك، مسئوليتك إنك توفر الوقت ده لنفسك وفي طرق كتير ممكن تعملها. واحد زي " تيم كوك" المدير التنفيذي لشركة أبل بيصحى كل يوم الساعة 3:45 الصبح عشان يرد على الإيميلات ويمنح وقت لنفسه قبل مايبدأ مسئوليات الشغل اليومية.
• برمج عقلك كل فترة: لحظة ما تتخلص من كل الافكار والمشاعر السلبية اللي إنت عاملها لنفسك دي لازم بعدها تبدأ تبرمج عقلك على إنه يكون ناجح من خلال إنك تتبنى دايما أفكار إيجابية وتكون فخور بكل شيء بتحققه في شغلك، وتحط لنفسك خطة عمل وتحيط نفسك بمجموعات دعم من زملائك وكل اللي حواليك وتسمع نصايح الناس الأقدم منك وتتعلم من قصص نجاح الناس اللي قبلك.
التعلم هو سمة كل شخص ناجح والخلاصة لونت عايز تنجح وتتقدم في شغلك والبيزنس بتاعك ابعد عن دماغك فكرة إنك تعرف كل حاجة ومش محتاج تتعلم لأن دي هتبقى أول خطوة في مشوار فشلك، ومتنساش تتخلص من كل أفكارك ومشاعرك السلبية وازرع مكانها أفكار تحفزك وتطلعك لقدام، اسمع لآراء غيرك بس في نفس الوقت خليك دايما واثق من نفسك وإمكانياتك ومتخليش للخوف أي مجال في حياتك.
