20/02/2026
عربية خارج الصندوق !
انا مش هتشوفني بتكلم عن عربية زيرو ولا هتدخل سكتها ديه عربيات ليها مستخدميها
و ليها مرتزقة بياكلوا من وراها عيش مقابل كلامهم قبضوا عليه
ما علينا
النترا AD sport عربية بكل ما تحمله الكلمة من معنى
رغم عدم حبي للكوري ( بسبب المواصفات اللي بنشوفها )
العربية ديه فيها كل حاجة
و هي استوك شكلها قوي و شرس و مش محتاجة يتصرف عليه جنيه تعديل في شكلها !!
عربيات قليلة جدا في العالم اللي فيها الحتة ديه نازلة مقفلة اللعبة مش محتاجة لمسة
حتى الجنوط ما سابوش حد يجتهد فيها
شكل و أداء ماشيين مع بعض تماما عربية مش كيوت نهائي
إنت بتتكلم عن موتور GDi تربو بيخرج سكة ال 205 حصان مع فتيس DCT بيكون 7 نقلات مش بيفكر ثانية انت محتاج تعمل إيه هو جاهز و حاضر معاك
الاهم و الأحلى انهم اهتموا في النسخة ديه بتأمين القوة ديه على الطريق بعيد عن نظرية النعش الطائر
العفشة في النسخة ديه ملهاش علاقة تماما في أي جزء بالنسخة اللي إحنا عارفينها سواء كانت AD محلي او كوري العربية بتاعت غبور الفاضية ديه 😅
عفشة مالتي لينك خلفى و مساعدين انشف شويتين و تماسك عالمي 👌
عيبها بس إنك هتتعب نوعا ما في شوية قطع ليها مش هتكون متواجده سهل زي النسخة العادية
و كمان العربية ديه قليلة جدا جدا و لو لقيتها للأسف بتكون عليها حظر ذوى الهمم و هيكون صعب التحرك بيها
العربية في الفئة السعرية بتاعت ال 800 ل مليون 200 حسب الحالة و الكيلو متر و فيه حظر او لآ و كده
انا بفضل ركوب الماني موديل قديم في الفئة السعرية ديه
بس لو على upgrade في الشكل و الموديل العربية تستحق تماما كل جنيه فيها
و بسعى بقالي فترة آلاقي واحدة بدون حظر و حالة و كيلو متر مناسب تجربة تستحق تدور عليها
العربية ديه مميزة في حتة القوة جدا و تنافس مع حاجات واصلة ل 3.5 مليون في حتة الأداء
نتكلم بكرة عن عربية تانية مفيش عليها ضوء جامد و هي تستحق ان الناس تعرفها و تدور عليها 👌
