11/12/2017
قصة سكودا و فولكس فاجن..
أولاً للى ما يعرفش.. سكودا من أقدم صانعى السيارات فى العالم مع مرسيدس و بيجو....
بدأت فى التشيك بمصنع لا مؤاخذة دراجات لعائلة اسمها فاكلاف عام 1895 و بعد 10 سنين عملوا نموذج ثورى فى وسائل المواصلات الا و هو السيارة.
عام 1925 اشترت المصنع ده شركة سكودا اللى كانت شغالة فى كل حاجة اسلحة و مراكب و معدات.. يعنى حوت كبير
و طبعا زيها زى غيرها لما الحرب العالمية إشتغلت كانت التشيك مع تحالف الإتحاد السوفيتى و بدأوا يتوجهوا الصناعة لسيارات رخيصة و قوية فى نفس الوقت.
معلش شوية تاريخ تانى.. لما الشيوعية انهارت مع الإتحاد السوفيتى كانت زى ما يكون منجم ذهب اتفتح للى معاه فلوس فمثلا العراق و إيران ما كدبوش خبر و راحوا يجيبوا علماء الذرة يعملوا أبحاث نووية مقابل رغيف عيش مثلا لأنهم كانوا معدمين..
فوكك من العراق و إيران... المهم معظم فطاحلة صناعة السيارات إتقدموا للعروسة (شركة سكودا التشيكية) و فازت فولكس بالمناقصة سنة 1991 مقابل 630 مليون مارك ألمانى لشراء حصة 31% والباقى مع الحكومة التشيكية..
طبعا الجماعة الألمان ما كدبوش خبر و صرفوا مليارات فعليا على البحث و التطوير و كانت أول سيارة سكودا تحت مظلة فولكس فاجن هى الفيليشيا اللى حققت نجاح كبير و بعدها الأوكتافيا..
طبعا برضه الإنتاج تضاعف من 130 الف سيارة سنويا فى 1991 إلى مليون سيارة فى 2015
مصانع سكودا حاليا المنوطة بالأبحاث فى التشيك و الهند و مصانع التجميع و الإنتاج فى الصين و روسيا و أوكرانيا و كازاخستان.
وكانت هذه قصة نجاح أكبر تعاون بين أوروبا الغربية و أوروبا الشرقية فى عز ما كانوا مش طايقين بعض..
قريبا نحكى قصة فولكس فاجن و أودى
المصدر:
The story of the acquisition of carmaker Skoda by the VW Group in 1991 is not just a textbook example of a great brand strategy. It also demonstrates how a smart East meets West merger should ideally be effected: with respect for the corporate tradition and acknowledgement of the difficult financial...
