Used Car Market in Cairo

05/07/2019

بما اننا كلنا صحينا علي خبر زياده اسعار البنزين و خلاص امتصينا الخبر و ادركنا ان الاسعار زادت , تعالوا بقي نشوف ايه الي نقدر نعملوا علشان نقدر نطلع من الموضوع ده باقل خساير, لكن قبل ما نبتدي مش معني ان الاسعار زادت و انت كنت بتحط لعربيتك 95 يبقي تعاقبها و تحطلها 92 و نفس الكلام لو كنت بتحط 92 متفكرش تقلل عن كده لانه هيزود استهلاك البنزين مش هيقلله ده غير انه هيضر موتورك.

بعادات بسيطه جدا في سواقتنا نقدر نوفر من 100 ل 150 كيلو متر في التفويله الواحده و بالتالي الزياده دي هتكون غير محسوسه, عايز تعرف ايه هي العادات دي ؟ اقرا البوست ده مش هياخد من وقتك اكتر من 60 ثانيه

⭐ 1- متسيبش العربيه دايره و هي واقفه الصبح او في اشارة

العربيه و هي واقفه و الموتور شغال بتكون في حاجه اسمها idle state و ده كله بيكون استهلاك بدون اي فايده , الطبيعي ان في الidling انت بتستهلك من 3-5 ليتر في الساعه و بالتالي فا انت بتخسر بنزين كتير بدون ما تكسب اي حاجه , الصح انك الصبح تدور العربيه و تستني 20 ثانيه بس , ده وقت كافي ان الموتور يوصل الزيت لكل اجزائه
و وقت لما تكون واقف في اشاره الافضل انك تقفل الموتور , لو مشوارك رايح راجع بيكون فيه من نص ساعه ل ساعه زحمه انت قافل فيهم الموتور فا انت بتوفر من 3 ل 5 ليتر في اليوم انت اولي بيهم.

⭐ 2- خليك مواظب علي الصيانات

اعلي تاثير علي توفير البنزين بيكون في الصيانات , البوجيهات و فلتر الهوا و طلمبه البنزين بس مسئولين عن 15 في الميه زياده في استهلاك البنزين ,علشان نشرح الموضوع ده بشكل بسيط لو عربيتك مش بتسحب هوا كافي فا هيكون فيه بنزين كتير مش محروق و بالتالي السحب هيكون ضعيف فا هتضظر تدوس بنزين اكتر علشان توصل للسرعه المطلوبه و بالتالي بتحرق بنزين اكتر , نفس الكلام طبقوا علي البوجيهات و طلمبه البنزين لو كفائتهم ضعيفه نسبه الحرق هتكون اعلي.

⭐ 3- خليك دايما محافظ علي كاوتش عربيتك علي الضغط المظبوط

ناس كتير جدا بتهمل النقطه دي, ما دام العربيه ماشيه, الكاوتش الي مش منفوخ للضغط المناسب بيزود الاحتكاك مع الارض وقت الدوران و بالتالي بتستهلك بنزين اكتر يوصل ل5% كمان لو حاله الكاوتش بتاعك سيئه ده بيزود في استهلاك فا بالتالي اول و اسهل حاجه نشيك عليها هي الكاوتش الخاص بالعربيه

⭐ 4- حساس الشكمان

حساس الشكمان الي تقريبا بايظ في نص عربيات مصر , جيه وقت اننا نركز معاه و نغيره لو تالف او مدي error علي الجهاز.
بشكل سريع كده علشان منطولش عليك حساس الشكمان ده بيحس بكميه الاكسجين الموجوده في العادم بتاع العربيه و علي اساسها بيعرف اذا كان فيه بنزين متحرقش في الموتور و عليه بيحدد نسبه دخول البنزين لغرفه الاحتراق علشان يوصل لاعلي كفائه

لو حساس الشكمان بايظ مش بيقدر يحدد كميه الاكسجين الي خارجه في العادم و بيشوفها دايما قليله و بالتالي بيزود كميه البنزين الي داخله لغرفه الاحتراق.

⭐ 5- قلل الوزن الي عربيتك شايلاه علي قد ما تقدر
كل 50 كيلو زياده في العربيه بتزود استهلاك الوقود ب2 ل 3 في الميه , يعني لو عندك كراتين ميه في الشنطه شيلها , لو سايب قطع غيار قديمه تقيله شيلها كل ده بيزود استهلاك البنزين

اخر كام حاجه كده سريعا , بلاش استخدام التكييف الا للضروره , كمان حاول من طريقه سواقتك انك متحرقش بنزين بkick down و لا انك تعتمد علي الفرامل بشكل اساسي لو لقيت نفسك داخل علي اشاره هدي من قبلها بفتره و خلي العربيه تمشي باقل حمل كمان متنساش انك تغير الزيت في ميعاده و تستخدم اللزوجه المظبوطه لعربيتك في الكتالوج

لو اتبعت الحاجات دي هتلاقي نفسك بكل سهوله قادر توفر من 100 ل 180 كم في التفويله الواحده

05/07/2019

بعد زيادة البنزين
إزاى توفر البنزين

1- متشغلش التكييف.
2- انسى الفرك والتخميس .
3- ممنوع تحرق على الغيار.
4- بطل العربية و انت نازل تشترى حاجة حتى لو 20 ثانية.
5- متشغلش التكييف.
6- بطل العربية فى الاشارات.
7- متسافرش بالعربية بعد كده.
8- لو معاك عربية اكتر من 1600 CC بيعها.
9- لو معاك عربية اكتر من 1200 CC بيعها برضه.
10- متشغلش التكييف.
11- ممنوع تركب اكتر من اتنين معاك فى العربية.
12- ممنوع تفتح اكتر من شباك و انت سايق.
13- لو السكة زحمة اركن على جنب لغاية ما تسلك.
14- خلى معاك حبل فى العربية عشان حتحتاجة كتير.
15- متشغلش التكييف.
16- لو فى اكتر من عربية فى الاسرة انصحك بالاستغناء عن واحدة ان لم يكن كلهم.
17- شغل التيربو و الديفيل و فلتر هواء الرياضى ده تنزل تشيله و تولع فيه وقتى.
18- حاول تسترزق فى السكة خدلك واحد من الطريق و خد اللى فيه النصيب.
19- الشد مع عربيات فى السكة دى بقت اسمها فقرة الذكريات.
20- ابوس ايدك متشغلش التكييف.
21- اللى معاه جيب او عربية دفع رباعى ده راجل يستحق الصدقة دلوقتى متنساهوش عشان ربنا يفتكرك.
22- عصر الشهامة و انزل اوصلك يا حاج انتهى ياريت تراجع نفسك تانى قبل ما تتشاهم.
23- لو ابوك قالك انزل وصل اختك او انزل هاتلى حاجة اعمل نفسك ميت.
24- القيادة فوق 100 كم/ساعة اسراف و تبذير ربنا حيحاسبك عليه.
25- متشغلش ام التكييف نهائياً .
26- اللى معاه عربية دلوقتى يستحق اى حسنة..عامله كانه فقير.
27- المشوار اللى اكتر من 20 دقيقة قيادة متروحش بالعربية.
28- لو ساكن بعيد عن شغلك يا تسيب شغلك يا تعزل اوفرلك صدقنى.
29- اى حاجة بتزود فى حرق البنزين صلحها من دلوقتى احسنلك.
30- الغى التكييف من العربية احسن.
31- اتعلم تسوق موتوسيكل او عجلة حتحتاجهم قريب.
32- لو عربيتك قديمة شوية استعمل بنزين 80
33- ادعى ربنا فى صلاتك ان السكة متكونش واقفة و انت بالعربية.
34- حاول تصاحب سواق ميكروباص و انسى ستايلك دلوقتى.
35- متشغلش التكييف عشان خاطر اولادك.
36- الاحتياطى فى التانك اهم من رصيد فى البنك.
37- تسخين العربية ميزدش عن 30 ثانية كحد اقصى.
38- بدل ما تروح لواحد صاحبك بعلبة شيكولاتة خدلك جركن بنزين احسن.
39- متفولش العربية عشان العداد حيغريك انك تمشى اكتر حط 10 لتر بس.
40- متشغلش التكييف حيتخرب بيتك..
ملحوظة : بﻻش تشغل التكييف أحسن لك و الأفضل متشغلش التكييف.

اوعى تنسى وايدك تيجى على التكييف بالغلط ويشتغل منك لا قدر الله
ولو حصل اركن فوراً و اغسل وشك واستغفر ربنا وإن شاء الله مش هتتكرر تانى ...

والله شكلك كده هتنسى وتشغل التكييف !!!

17/11/2018

17/11/2018

Mitsubishi 3000 GT
الافعي اليابانيه
مكنه Mivec g6v35
350 hp
ومع شويه تعديل بسيط 850hp
هو انا عاشق ل JDM من شويه
عندما كانت اليابان تبدع
وتضزب بيد من حديد

17/11/2018

17/11/2018

وييجي السؤال بتاع دخلة كل شتا 🤔..
أسخن العربية ولا لأ🙄؟؟
طيب أسخنها قد ايه⌚؟؟
-ليه فكرة تسخين العربية أصلاً🤔؟؟
=عشان الكربراتير في العربيات القديمة مكنش بيعرف يشتغل كويس طول ما هو بردان⛄,
كان بيلخبط نسبة الهوا والبنزين اللي داخلين موتورك,
يا اما يدخل بنزين قليل فالعربية تطفي لو حاولت تطلع بيها, يا اما يدخل بزيادة فتلاقيها بتطلع دخنة سمرة..
عشان كدة تلاقي الناس اللي معاها عربيات قديمة دايماً تدور العربية وتفضل تزود بنزين شوية عالواقف كدة لحد ما العربية تبدأ تتدفي..

-طب ولما بقت عربياتنا Injection يعني شغالة برشاشات بنزين🚘؟؟
=خلاص المشكلة اللي فوق دي اتحلت وبقي كمبيوتر الرشاشات عارف كويس أوي يرش بنزين قد ايه ..
مشغل معاه سنسور واقف علي مدخل الهوا بتاع الموتور يعرفله داخل أكسجين قد ايه عشان يرشله بنزين علي قده عشان كدة دايماً كمية البنزين هتبقي كافية ان الحريق يتم والمكنة تفضل دايرة مش زي الكربراتير..
-يبقي منسخنش العرببه😎 ؟؟
=اتقل بس ..🙄🙄هنا بقي لازم نصارحك بمشكلة تانية للعربيات الباردة🤔..
لما حضرتك تكون راكن العربية 8 ساعات بالليل🕰️ وتيجي تصحيها الساعة سبعة الصبح🕖
خليك حاطط في بالك ان زيت الموتور بيبقي نايم في الكارتيرة ومتغطي⌛ ..
وكتر البرد بتاع بالليل دة بيخلي اللزوجة بتاعته تعلي, يعني لما تدور العربية الزيت بيبقي كسلان كدة في حركته ومش بينتشر في الموتور بسرعة ..
الطرمبة تقوله اطلع يلا عند الكامات فوق انجز
يروح باصصلها بقرف😏😏 كدة ويقولها مابراحه! وده سبب ان العربيات صوتها بيكون عالى الصبح لحد متسخن العربيه
الخناقة دي بتاخدلها شوية وقت لحد ما الزيت يطلع فوق, وساعتها بيكون موتورك شغال من غير تزييت خالص عشان الزيت ملحقش يوصل يعني, فماتجيش انت بقي تقرص عالعربية والمكنة لسة متزيتتش .. هي مش هتقول لأ .. بس عمرها الافتراضي هيقل عشان الأجزاء المتحركة فيها هتبقي بتاكل في بعضيها ومفيش زيت يليّن الدنيا بينهم
-يبقي نسخن العربية😎😎؟؟
=اركب عربيتك الانجكشن الجميلة .. لف مفتاحك لفة واحدة لحد ما لمبات العداد تنور ..
استني لما شوية منهم يطفوا أو تلاقي عداد البنزين رفع عشان تكون الكهربا تممت عالحساسات زي ما بيقولوا .. دور عربيتك .. البس حزامك كدة وحط نضارتك وافتح شبابيكك واعدل مراياتك هتكون خدتلك نص دقيقة في الكلام دة ..
حطها عالـ D وطريقك أخضر🛣️ ..
افضل ماشي بيها بالراحة لمدة 3 دقايق مثلاً أو لحد ما مؤشر الحرارة يرفع لدرجته الطبيعية ..
ساعتها انت اتطمنت خلاص ان الزيت انتشر في المكان وبقت كل حتة في موتورك مابتاكلش في نفسها من كتر الاحتكاك وعمرها الافتراضي يزيد
الزتونة:
1- معاك عربية قديمة يبقي دورها وسيبها تسخن زي ما الحاج علّمك تعمل..
2- معاك عربيه جديدة انجكشن يبقي هما تلاتين ثانية عالسلانسيه واطلع من غير ما تقرص..

08/11/2017

تقطيع العربيات ( نصين )
يجب أولاً شرح وتعريف معنى “العربيات النصين”: وهو تجميع نصين “خلفي وأمامي” لموديل واحد ولكن من سيارتين مختلفتين، ويتم تجميعهم داخل بعض الورش في منطقة الحرفيين، وفي تلك الحالة تكون أنت من تتحكم في مواصفات السيارة ولونها ، وبعد تجميع السيارة ولحمها يصبح منحها الصفة القانونية هو الأمر الصعب لأن السيارة مجرد دمج بين سيارتين، وليس لها أي ورق أو افراج جمركي، ولذلك يلجأ صاحب السيارة الى شراء سيارة من نفس النوع ولكن قد تعرضت لحادث كبير أو تم حرقها للحصول على أوراقها ورخصتها وملفها في المرور، ويتم الحصول على رقم الشاسيه من السيارة الحادثة أو المحروقة، و يلصق الرقم علي السيارة المجمعة، ويتم عمل ورق للموتور الجديد وبذلك تصبح السيارة قانونية. العربيات النصين (3) الاسباب وراء تلك العملية الخطيرة، يرجع الى ارتفاع أسعار السيارات والجمارك، والتي تجعل بعض تجار السيارات الى استيراد السيارات مقسمة وكأنها قطع غيار، للهروب من الجمارك المرتفعة وبعد ذلك يتمكن من بيع القطع داخل مصر بسهولة . أين وكيف تتم عملية تجميع ولحام انصاف السيارات؟ تتطلب عملية تجميع انصاف السيارات الى ورش معدة لذلك من حيث المعدات اللازمة لعملية اللحام، ودائماً ما يكون هذا المكان قريبا من اماكن اصلاح السيارات مثل (الحرفيين -) ويقوم بعملية اللحام عمال محترفين ومتخصصين في ذلك حتى لا تتم كشف اللحامات . المرحلة التي تلى عملية لحام انصاف السيارات هي الموتور وغالبا ما يتم شراؤه من محلات قطع الغيار المستعملة في القاهرة او بورسعيد حتى يتم ترخيصه بطريقه سهلة نظرا لحصول مشترى الموتور على الاورق الخاصة به. من المشكلات الاساسية التي تواجه دائما تجار انصاف السيارات بعد تجميعها هي الاوراق الخاصة بترخيص تلك السيارات فغالبا ما يتم البحث عن سيارات محطمة او محروقة مطابقة لنفس نوع وموديل السيارة المجمعة ويتم شراء اللوحة المعدنية ورقم الشاشية فقط ويتم قطعه من خلال محترفين وغالبا يكون رقم الشاسيه مدون في حوض الموتور أو على البطاحة. العربيات النصين (4) نوع السيارات التي يتم تجميعها من افضل السيارات التي يتم استيراده على نصفين ليكون هامش الربح بها عالي ويساوى المجازفة هي السيارات الفارهة و بالأخص سيارات الـ “بى أم دبليو” بأنواعها حيث انها تجد رواجا كبيرا بين فئات الشباب ويتراوح سعر موتور تلك السيارة ما بين 25000 الى 30000 جنيه بالإضافة الى تكلفة شرائها قبل عملية اللحام و شراء اوراق الترخيص فقد يصل هامش الربح الى 50.000 جنيه. وقد يلجأ بعض التجار لاستيراد انصاف السيارات من دولة مثل الامارات نظرا لسرعه عملية قص السيارات وتعدد الورش المتخصصة في عمليات التقطيع. عقوبة تزوير ورق السيارة المشطورة نصفين يقر قانون العقوبات الخاص بالجنايات والجنح المضرة بالمصلحة العامة انه يعاقب بالأشغال الشاقة المؤقتة او السجن كل من قلد او زور اوراق رسمية (حكومية) وتتراوح العقوبة من سنه الى مده لا تزيد عن عشر سنوات.

03/11/2017

الجو ابتدي يكون شتا ، القطط في الشتا بتهرب من البرد و بتستخبى و بتنام في اى مكان و خصوصا ما بين كوتشات العربيات ،، كل واحد يبص كويس على العربيه و على الكوتشات ،، خبط برجلك اعمل اي صوت قبل ما تدور العربية ،، و بلغوا اى حد معاه عربيه تعرفوه و خلوا بالكوا من فضلكم .
❤الراحمون يرحمهم الرحمن❤
شير في كل مكان