18/05/2021
منقول # #معلومات عن كاوتش السيارة
في الكاوتش 6 شركات كبيرة اللي هما يعتبرو الكريزة
1- ميشلان (فرنسا)
2- بريدجيستون (يابان)
3- جوديير (امريكي)
4- بيريللي (ايطالي)
5- كونتينينتال (الماني)
6- دانلوب (بريطانية الاصل ومملوكة من جوديير وكام شركة كاوتش تانية)
باقي الشركات تعتبر متوسطة الحجم بالنسبة للستة الكبار زي
- هانكوك (كوري)
- كومهو (كوري)
- تويو (ياباني)
- يوكوهاما (ياباني)
- نيكون (فنلندي)
نتكلم عن الكاوتش
اولا المقاس وده سهل قرائته, علي اي عجلة هتلاقي الاتي وده اداة تعريف متعارف عليها بين كل شركات الكاوتش
R16 205/55 H
R 16 مثلا
ده معناه ان مقاس الجنط نفسه 16
R ترمز الي Radial وده القطر
195 - 205 - 215 - 225
ده عرض الكاوتش علي الأرض ويقاس بالمللي متر
50 - 55 - 60 - 65
ده ارتفاع الكاوتش من الجنط الي الارض ويقاس بالمللي متر
في مثلا لما تلاقي عجلة مكتوب عليها R17 215/50 ده معناه جنط 17 في مقاش العجلة 17 وعرضها 215 وارتفاعها من الجنط عن الارض هوا 50 مم
السرعة القصوي للعجلة وتحدد ب حرف انجليزي
H 210 كم في الساعة
V 240 كم في الساعة
W 270 كم في الساعة
حطيت صورة توضح فروق السرعات وده معناه ان بعد السرعة القصوى المحددة العجل بيسخن جداً من الاحتكاك المتواصل وفيه احتمال انه يحصل فقد للضغط او انه ينفجر
سنة الانتاج مكتوبة بالصيغة الاتية علي العجل
السنة 52 اسبوع
فمثلا هتلاقي 1415
اول رقمين ترمز الي الاسبوع وتاني رقمين يرمز الي السنة
يعني انتاج العجل للرقم ده يبقي الاسبوع ال 14 (نصف شهر مارس) سنة 2015
من المفضل دائما انك تشتري عجلة معداش علي انتجها 18 شهر علشان المطاط بيبدأ يفقد خواصه بعد 3 الي 5 سنين حسب نوع المطاط المستخدم في العجلة من الشركة المنتجة
اسباب تلف العجل
البلالين بتحصل لما الكاوتش ضغطه بيكون غير مظبوط ويتزنق بين الجنط ورصيف او مطب او حفرة عكسية او شوية اسمنت بارز علي الطريق
ملهاش علاج لان ده قطع في مكونات العجلة الداخلية ويستحسن تتغير في اقرب وقت ممكن ولو مش في مقدرتك بلاش جري وضغط علي العجلة
الاخرام
العجل التويبلس لما بيتخرم بيفقد الهواء تدريجيا لان المسمار او سبب القطع ايا كان بيكون محشور في العجلة في الفقد بيكون تدريجي وممكن تلاقي العجلة نامت بعد يوم كامل او بعد ما تركنها بشوية
لو العجلة نامت فجأة وانت ماشي ممكن تكون اتخرمت/اتقطعت من حاجة ثابتة في الارض في مش بيكون فيه عائق ان الهواء يخرج فبتنام علطول
لو لقدر الله وقفت عند واحد بتاع عجل في طريق سريع او بنزينة سبق عليه وقوله العجلة فيها خرم واحد او 2 علي اكثر تقدير وخليك واقف علي دماغة وهوا بيكشف لانه لو لقاك مش فاهم هيلبسك 7 او 11 خرم ويبقي بوظلك العجلة ومفيش عجلة بتتخرم 11 خرم مرة واحدة مش ماشي علي سجادة مسامير من بتوع الهند! 😀
ايه احسن عجلة في السوق؟
مفيش حاجة اسمها احسن عجلة في حاجة اسمها طريقة سواقتك ايه
يعني لو بتحب تجري وفرامل متأخرة الخ يبقي تجيب عجلة سبورت زي Bridgestone Potenza Adrenaline Or Bridgestone My02 ده بيديك تماسك اكتر وبودي رول اقل ولكن مع راحة اقل بكتير لان ال Side Wall بيكون ناشف علشان النقشة دائماً تكون ملامسة للارض. هتحس العجلة بتدب
لو سواقتك هادية وبتحب توفر بنزين (ايوه نوع العجلة بيوفر بنزين لان معامل الاحتكاك بيحكم) ممكن تتجة للعجل ال Premium Comfort زي Bridgestone Turanza GR-90 هتديلك راحة اكبر بكتير وانعم مع الحفر والمطبات ولكن علي حساب الفرملة الاقوي وانك تاخد ملفات اسرع الخ
لو سواقتك علي شعرة شوية جري وشوية مشي عادي ممكن تجيب عجلة Hybrid او Balanced زي Goodyear Efficient Grip Performance or Nokia Z-Line وده مساكة العصاية من النصف علشان تديلك الكويس من الراحة والفرامل والكورنر
ازاي تحافظ علي عجلتك
اظبط هواء العجلة كل 10 ايام (روتيني كده 3 مرات في الشهر) منه تتأكد ان العجل ضغطه بيقل بالمعدل الطبيعي (من 2 الي 4( PSI
ملمع العجل ال ARMOR ALL مش بيلمع وبيدي شكل حلو فقط, ده بيطري مطاط ال Side Wall بتاع العجلة وبيقلل من حدوث البلالين لان العجل مش بيشقق بسرعة
العجل بيتغير بمعدل التأكل وبيبقي بالمم وينصح بتغيير العجلة لما العمق بتاع النقشة يوصل ال 4مم او 3مم
الموضوع كبير جداً وفيه نوع المطاط وطريقة بناء العجل ولكن اتمني اكون وضحت شوية وربنا يستر طريقكم 🙂
برجاء الدعاء لصاحب البوست ان ربنا يجعله في ميزان حسناته
لو شايف انك استفدت من البوست اعمله مشاركه عشان الكل يستفيد لان خير الناس انفعهم للناس
تمنياتي لكم بالسلامه
