El-Garage Service Center

06/03/2014

ABS

Anti-lock Braking System = ABS
وهو النظام اللي بيمنع زحف السيارة عند الضغط علي دواسة الفرامل بشكل مفاجيء من خلال التحكم بالضغط على تيل الفرامل ليمسك الأقراص (الديسكات) ويسيبها عدة مرات بشكل دقيق جداً وآلي خلال أجزاء من الثانية ممكن توصل أحياناً إلى 15 مرّة في الثانية وكأن ضغطة السائق على دواسة الفرامل بيتجزأ إلى أجزاء يعني بيتجزأ الي عدة ظغطات بتخلي العجل في حالة دوران مستمر بيقل تدريجيا لغاية وقوف العربية في وقت أقل من الوقت اللي ممكن تستغرقه العربية لو نظام الفرامل فيها عادي.. يعني الفرق ان في النظام العادي العجل هيقف أسرع لكن العربية هتزحف وبالتالي هتاخد مسافة أطول عشان تقف لكن في نظام الإيه بي إس العجل هيقف في وقت أطول بأجزاء من الثانية لكن العربية مش هتزحف وبالتالي هتاخد مسافة أقل عشان تقف.

ملاحظة مهمة: عند الضغط المفاجيء علي دواسة الفرامل وعمل هذا النظام يشعر السائق بصوت إرتجاج أو تكتكة أو كركرة في دواسة الفرامل وهو الصوت الناتج عن ظغط التيل علي الدسكات ثم فك الضغط مباشرة ثم الضغط مرة أخري ثم الفك وهكذا حتي تتوقف العربية.. وإذا شعر السائق برد فعل عكسي علي قدمه خلال عملية الضغط علي دواسة الفرامل يجب عليه الاستمرار حتي تقف العربية.

06/03/2014

سكودا أوكتافيا فانتازيا موديل 2010/5 أول فئة تيبترونيك
--------------------------------------------------------------------
عيش مع التقرير المحترم ده ...

* بعض أسعار قطع الغيار :-

- زجاج أمامي 1350 جنيه شامل التركيب.
- 4 طنابير 2300 جنيه شامل التركيب.
- قربة مياه التبريد 180 جنيه شامل التركيب.
- الإطارات 520 جنيه للإطار الواحد ( سعر جملة ).

المميزات وحالة أساسيات السيارة بعد مسيرة 100000 كم
-------------------------------------------------------

1- شكل السيارة الخارجي .. إذا تخلينا عن مصطلح " أذواق " .. تصميم ممتاز ويعطيك إحساس بالفخامة والوقار.
2- صاج السيارة محمل ومتين جداً خصوصاً الإكصدامات. ومع مرور الزمن يظل محتفظ بقوته دون التأثر بعوامل التعرية.إلا جزء معين هتناوله في العيوب.
3- دهان السيارة ممتاز جداً وقوي ولا يتأثر أيضاً مع مرور الزمن بعوامل التعرية كالشمس والحرارة.
4- خامة فوانيس السيارة ممتازة ولا يحدث لها خشانة أو غيمة حتي مع السفر لفترات طويلة.
5- المظهر الداخلي للسيارة .. إذا تخلينا عن مصطلح " أذواق " .. تصميم رائع ومنظم.
6- الخامات الداخلية لمقصورة السيارة ممتازة بما فيها من جلد / بلاستيك / نواكل / تطعيم أبواب وطابلوه / قماش.
7- تطعيم الأبواب والطابلوه والنواكل الموجودة بمقصورة السيارة لا تتأثر مع مرور الوقت..والمقصود هنا إنها مش بتتمسح زي كثير من السيارات بسبب العرق والحرارة والملمعات.
8- قماش وتنجيد الكراسي ممتاز ومش بيهبط مع مرور الوقت.
9- شاشة البيانات اللي بين العدادات ونور العدادات والأزرار حالتهم ممتازة ومفيش حاجة فيهم ضعفت أو فصلت أو شئ من هذا القبيل.
10- عزل السيارة .. العربية وهي دايرة متحسش إنها دايرة..والإحساس ده زاد بعد إستخدام زيت محرك كاسترول .. عزل صوت المحرك .. وإنت ماشي علي سرعة 100 كم / س عدد لفات الموتور بيكون حوالي 2500 لفة تقريباً وعلي السرعة السادسة ومش بتسمع صوت الموتور..وعامةً صوت الموتور مش بتسمعه غير لما تعمل kick down فقط ومش بيبقي مزعج زي ما ملاك كتير بيقولوا ولا بيبقي خشن.اللي عاوز يسمع صوت موتور عالي جداً وخشن لدرجة الصداع .. يجرب يجري بعربية لانسر بومة ويقول لي رأيه..في نقطة مهمة جداً..إن موديلات 2011-2012-2013 نزل منها سيارات كتير بدون وش فيبر للموتور..وده عليه عامل في العزل..حسبي الله ونعم الوكيل في سياسة التوفير في مصر
-----------------------------------------------------------------
11- عزل صوت الطريق أثناء السير..بعد تغيير الكاوتش اللي نازل مع العربية ( الكونتينينتال الألماني ) العزل إتحسن بصورة كبيرة جداً..عزل صوت إرتطام الهواء بجسم السيارة أثناء السير علي سرعات عالية.جيد جداً وليس ممتاز.
12- نظام التعليق في السيارة بحالة الزيرو رغم الـ 100 ألف كم ولكن تحتاج لأطياش ميزان أمامية وده إكتشفته وقت صيانة الـ 100 ألف وقالولي عليه.لكن أنا مش حاسس بحاجة غلط وأنا ماشي في طريق مكسر..فربنا يسهل هوديها فرع تاني أتأكد.لكن حالة مساعدين / مقصات بمشتملاتها / سكاترا / بطاحات / يايات..كل ده زيرو ولله الحمد.
13- بالنسبة للموتور والفتيس .. وأنا جمعت بينهم في نقطة واحدة لأنهم بيكملوا بعض..الفتيس بعد المسافة المقطوعة دي كلها بنفس حالته والعربية لسه زيرو.لا يوجد أي نتشة أو هبدة.أو تأخر في النقلات أو خلل في الـ kick down .. وده بفضل الله أولاً ثم بالإلتزام بتغيير زيت الفتيس علي 60 ألف كم..بالنسبة للموتور..الحمد لله أدائه زي ما هو بل إتحسن أكتر بعد ما كان تسارع السيارة من 0-100 في 14 ثانية حالياً في 12.5 ثانية..ولا يوجد أي عادم أو رجة في المحرك أو خشونة أو تسريب سوائل أو سماع أي أصوات غريبة أو خلل في حساس من الحساسات.ويظل حتي هذه اللحظة بيبخر مية من الشكمان.ولسه النهاردة جايب بيها 200 كم/س علي الطريق المؤدي لدريم بارك 6 أكتوبر بعد الدائري.
14- تكييف السيارة..لله الحمد بنفس أداء التبريد من أول ما إشتريت العربية حتي تاريخه.ولا يوجد أي خلل أو ضعف في الكباس والفريون بتاع الفبريقة زي ما هو..
15- موتور ضم المرايات الجانبية بنفس حالته ومحصلوش أي مشكلة الحمد لله.
16- جميع وظائف السيارة تعمل بشكل طبيعي.
17- وضعية الجلوس في المقاعد الأمامية مريحة جداً سواء للسائق أو الراكب الأمامي.وعمري ما حسيت وأنا سايق إني مش مستريح.وأنا من النوع اللي لازم أكون قاعد وذراعي مفرود وأنا ماسك الدريكسيون وعمر ما رجلي خبطت في طابلوه العربية وأنا قاعد ولا حسيت بمشكلة في وضعية دواسة البنزين.( الرك علي ظبط وضعية الكرسي صح )
18- وضعية الجلوس علي الكنبة الخلفية مريحة ومش ضيقة بالدرجة الشائعة بالنسبة لراحة القدمين.وذلك بشرط ضبط مسند ظهر المقاعد الأمامية بطريقة معينة بحيث تكون مريحة أيضاً للراكب الأمامي.
19- النظام الصوتي للسيارة رائع بمعني الكلمة والحمد لله مشتملاته كلها من كاسيت وسماعات بحالتهم زي ما هما مفيهومش أي مشكلة.
20- نظام البلو توث جيد جداً وعمره ما عمل معايا أي مشكلة في إستقبال أي command مني ويعمل بكل فعالية.

---------------------------------------------------------------------------

العيوب :-
----------

1- أعتقد إن كبوت العربية دي مش بمتانة باقي صاج السيارة.

2- جلد الطارة بيتمسح مع مرور الوقت.الحل هو كسوة جلد عند سروجي محترم أو عليك وعلي جينز كار.

3- الإطارات اللي بتنزل مع العربية ( كونتينينتال ألماني ) فاشلة فاشلة فاشلة في موضوع عزل صوت الطريق. الحل هو إستبدالها بنوع آخر مثل فولدا أو كومهو أو هانكوك.

4- مع تكرار الغسيل المرايات الجانبية مع الضم الكهربة بتعمل صوت تزييق..الحل هو إنك ترش wd-40 ومش هتسمع بعد كده أي أصوات.

5- مساند الرأس الخلفية للكنبة بايخة شوية في إن البروز بتاعها زيادة شوية.

6- مش هعتبرها عيب.. نظام الـ climatronic للتكييف بايخ شوية لناس كتير لأن له نظام تشغيل معين..وهو كالآتي..
* لو عاوز التكييف يظبط نفسه علي درجة البرودة المناسبة خليه علي 18 درجة مئوية.وإعمل نظام دوران الهواء علي وضعية A عشان تسمح بتجديد الهواء كل 5 دقايق تلقائياً.وكده هيبدأ سينسور الحرارة الداخلي يظبط درجة التبريد..وبعد الإختبار..لما بتكون درجة حرارة الجو الخارجية 40 درجة مئوية..سرعة المروحة بتاعة التكييف بتكون علي 3 بعد إنهاء عملية تهيئة البرودة.
* لو عاوز أفضل أداء لتبريد التكييف.أظبط البكرة علي العلامة الزرقاء وإعمل سرعة المروحة علي 5 لمدة 10 دقايق وبعدها نزل السرعة لـ 3 .. وابقي تعالي قوللي إنت مبتفهمش حاجة لو إستحملته :)
* عاوز لما تقفل التكييف وتفتحه يفضل محتفظ بالوضعية اللي إنت عاملها..لما تقفله بتدوس علي زرار off .. بردو لما تعوز تفتحه تاني دوس علي زرار off ومتدوسش علي زرار ac هتلاقي كل حاجة زي ما هي وسرعة المروحة اللي إنت ظابطها مش هتتغير.بس خد بالك ده في حالة إنك تكون عامله علي العلامة الزرقاء.

7- بعد فترة باب الراكب الأمامي الأيمن بيحصل في الشباك بتاعه خللِ ما..بيسبب إن الزجاج يحصله لخبطة أثناء الغلق تلاقيه بينزل تاني لوحده وعشان تقفله لازم ترفعه سِنة سِنة لحد ما يقفل..الحل هو تغيير ترس الواير بتاع ماكينة الزجاج من بلاستيك لفيبر مقوي..وسعر الترس ده 70 جنيه في الوكالة ومتحاولش تروح التوكيل عشان هيقولولك عاوزة ماكينة زجاج بـ 2500 جنيه ( تقليب الزبون ).

8- بعد فترة سنتين كده ممكن لمبة أو لمبتين يتحرقوا لوحدهم في الفوانيس..الحل هو تغييرهم بأصلية وحط تحت الأصلية دي 100 خط.عشان لو جيبت أي لمبة هتكون إضائتها ضعيفة وتتحرق بسرعة.

9- كان نفسي شنطة العربية دي لما تفتحها من الريموت تتفتح لفوق علي طول..مش لما تفتحها من الريموت تفك تعشيقة الكالون وتترفع نص سم وتقولك نكتفي بهذا القدر !!! وتفسير العيب ده هو تقل باب الشنطة بغباااااااااااااء...لم أتوصل لحل حتي الآن.

06/03/2014

Hyundai Coupe 2005

ميزة رائعة فى هذه السيارة .. مع الشكل ال سبور ولكن قطع غيار فيرنا ..
يعنى تركب عربية سبور .. وتصرف عليها مصاريف الفيرنا ..

هايلة

28/02/2014

الصيانة الدورية ... هيونداى و مازدا

28/02/2014

هى اقرب لل 127 التوب
عربية محبوبة بالنسبة لجيلها

28/02/2014

عودة ال 127 :)

27/02/2014

لو عاوز تشترى عربية عملية و سعرها معقول يبقى لازم تشوف المقارنة ديه بين اللانوس والفيرنا

1- اللانوس هى عربية جنرال موتورز قلبا وقالبا،فشركة دايو من يوم ما ابتدت فى تصنيع السيارات، وحتى قبل ان تشتريها جنرال موتورز وهى تعتمد تماما على تصميمات جنرال موتورز(أوبل تحديدا)، والسيارة اللانوس ما هى الا السيارة اوبل استرا موديل 1995 من ناحية الموتور وقاعدة العجلات(الشاسية يعنى) والات الجر ونظام التعليق (العفشة)،وكل شئ، فقط !! تختلف فى الشكل الخارجى والصالون الذى اعيد رسمه ليناسب موضات اواخر التسعينات
2-الفيرنا(سأتكلم هنا عن الفيرنا 1500 فقط لانها هى المقابلة للانوس): مبنية على محرك وشاسية وتعليق والات جر اللانسر كريستالة، حيث ان هيونداى تعتمد على تكنولوجيا مشتراه من ميتسوبيشى

بالنسبة للمحرك: يوجد تحت كبوت السيارة اللانوس واحد من اشهر المحركات واكثرها انتشارا فى العالم، محرك E-tech المصمم بواسطة جنرال موتور ادى واجبة ولا يزال فى دفع العديد من طرازات جنرال موتورز للأمام فى قارات العالم السته، فهذا المحرك عمل مع السيارة اوبل استرا وفيكترا موديلات 95 والتى تعمل فى اوروبا باسم اوبل وفى انجلترا باسم فوكسهول وفى امريكا الجنوبية تحت اسم شيفورليه وفى استراليا تحت اسم هولدن، كما عمل مع الدايو لانوس فى كل دول العالم وحاليا مع الشيفرولية افيو(التى هى انسخة الجديدة من اللانوس) والشيفروليه كورسا البرازيلية التى تباع فى مصر باسم اوبل كوسا سيدان، هذا المحرك يستحق تقدير ممتاز وهو افضل ما فى السيارة اللانوس، المحرك احادى الكامة ذو 8 صبابات يعطى قدرة قصوى فى حدود 85 حصان عند 5500 RPM، نظام تغذية الوقود عن طريق الحقن الإلكترونى،
بالنسبة للفيرنا 1500نجدها تحمل محرك سلفتها الأكسنت 1998، والذى هو بشكل ما نفس محرك اللانسر البطة او الكريستالة مع تعديلات تكنولوجية طفيفة جدا، مبنى ايضا بنظام الكامة الواحدة العلوية و 12 صباب ولكن بتصميم فريد جدا يجعل الإتصال بين الكامة العلوية والصبابات عن طريق منظومة من الروافع(التاكيهات) والميزة التى اراها واضحة فى هذا التصميم هى سهولة ضيط خلوصات الصبابات (ضبط التاكيهات) عند اى ميكانيكى بدون الحاجة للذهاب لمختص الصبابات، فينما لا يستطيع الميكانكى العادى ضبط تاكيهات اللانوس او الشاهين او حتى ال128 لان ضبطها يتم عن طريق تغيير اطباق الكامة وهو امر يحتاج مختص، فإن تاكيهات اللانسر والأكسنت والفيرنا يستطيع الميكانيكى الجيد ضيطها، ولكن يعيب هذا التصميم كثر الاجزاء المتحركة فى الموتور وهو امر غير مطلوب، الصراحة حاولت البحث عن القدرة الحصانية لهذا المحرك فى حدود 92 حصان

الأداء: ملامح اللانوس فى الاداء تبدو كالتالى، المحرك يكون كسول الى حد ما فى RPM المنخفضة ولكنه بمجرد تجاوز حد ال2500 RPMيعلن عن عنفوانه ويكشر عن انيابه ويطير بالسيارة الى مد البصر تاركا السيارات المنافسة تعانى الغبار الذى اثارتة اللانوس، ولذلك فهى من السيارات البطيئة فى الإنطلاق ولكنها تعوض هذا البطء فى السرعات العالية، ثبات السيارة على الطريق معقول وان كان يسوء الى حد ما فوق ال120، ولكن يوجد حل بسيط لهذة المشكلة البسيطة هو تركيب جنوط سبور من نوع جيد، قدرة السيارة على المناورة افضل من معقولة، فرامل السيارة تبدو الى حد ما فقيرة تصميما ولذلك فهى تجاهد لإيقاف السيارة( على رأى ممدوح عبد العليم قى فيلم بطل من ورق: مابيعرفش يواجيفها مابيعرفش بيواجيفها)

الفيرنا بعكس اللانوس سيارة ترغب فى القفز من على الأرض بمجرد رفع القدم اليسرى من على دواسة الدبرياج، فتشعر وكأن السيارة سوف ترفع عجلاتها الأمامية عن الارض كما يفعل الحصان ثم تطير من على الأرض، ولكن الملاجظ ان هذة الثورة فى الإنطلاق تفقد حماستها الى حد ما مع السرعات العالية فلو افترضنا ان اللانوس والفيرنا انطلقتا معا بأقصى ما تسمح به محركاتهما فانا اتوقع ان الفيرنا بسرعة انطلاقها العالية ستختفى من مجال إبصار سائق اللانوس لفترة ولكنها لن تصمد مع اللانوس فى السرعات العاليه حين تلحق بها وتتخطاها، فرامل الفيرنا افضل كثيرا من اللانوس وقدرتها على المناورة لا تختلف كثيرا عن قدرة اللانوس وكلاهما جيدتين، لكن الفيرنا المجمعة محليا يعيبها بشدة عدم الثبات على السرعات العالية وحتى الأن لم يفيدنا احد بحلول لهذة المشكلة

الصوت: محرك اللانوس رغم انه ليس اهدأ محرك فى العالم لكنه افضل بمراحل من محرك الفيرنا من وجهة نظر الصوت، محرك اللانوس له زنه مميزة لكنها ناعمة و مريحة للأذن وليست مرتفعة، لكن محرك الفيرنا خشن و صوته مرتفع وغير مريح وهو احد النقاط التى اعتبرها سلبية للفيرنا، لكن نلاحظ بالمقابل ان الفيرنا صوت آلات الجر بها غير مسموع فى حين يبدو واضحا فى كابينة اللانوس، ايضا نلاحظ ان عزل صوت الطريق فى الفيرنا افضل من اللانوس فبينما ان اى عقب سيجارة يخبط فى السيارة اللانوس من اسفل يرن بداخل الصالون فإن دوشة الطريق اسفل السيارة غير مسموعة فى الفيرنا

الراحة: الباور ستيرنج والتكييف فى كلتا السيارتين ممتاز، وضع القيادة مريح فى كلتا السيارتين، الفيرنا افضل فى التعامل مع دواسات البنزين والفرامل لان مشاويرها اقصر، الرؤية الخلفية والمرايات قاصرة جدا فى اللانوس بسبب ارتفاع الشنطة وصغر الزجاج الخلفى لكنها معقولة فى الفيرنا

الإتساع: صالون اللانوس اوسع لكن شنطة الفيرنا اكبر والسيارتين بنفس الطول (420 سم)

المتانة: شاسيه اللانوس يعتمد عليه تماما فهو احد الإبداعات القيمة لجنرال موتورز التى تهتم تماما بمتانة الشاسيه، اما الصاج الخارجى للانوس فلا استطيع ان اعطيه اكثر من خمسة على عشرة، ارق كثيرا مما تتطلبه ظروف بلدنا التى يعتبر اهلها سيارات الغير الموجودة فى الشارع هى الإمتداد الطبيعى للكنبة الموجودة فى البيت، وكبوت سيارات الغير هو المكان الملائم للاكل والمذاكرة وتبادل عبارت الغرام. الخامات المستخدمة فى صالون اللانوس تقييمها من ناحية المتانة 6 من 10

بالنسبة للفيرنا جاء صاجها الخارجى نقلة تاريخية فى تاريخ هيونداى التى عودتنا فى السابق انها تصنع سياراتها من ورق الكلينكس المعاد تدويره، ولكن مع الفيرنا هيونداى قدمت لنا صاج خارجى رائع ، فبينما ان سيارة مثل الإكسيل تحصل على 3 من عشرة للصاج الخارجى ، اجرؤ على ان اقيم صاج الفيرنا ب 8 من 10، اما عن شاسية الفيرنا فهو لايزال حارس مرمى لم يختبر، ولكنى متفائل من ناحيته ولا ادرى ما السبب، وخامات الصالون افضل الى حد ما من اللانوس

الأنافة: هذة بالطبع مسالة اذواق ، ولكنى بشكل شخصى ارتاح للمنظر الخارجى للفيرنا وشكل صالونها، لا لشئ سوى ان عينى ترتاح للخطوط الحادة اكثر من الأسطح المنحنية(الكيرفات)

العمر المتوقع: التجارب تقول ان محركات جنرال موتوز معمرة عن محركات هيونداى، ويمكن مقارنة عدد السيارات اللانوس المفوتة المدخنة الموجودة بالشارع(تقريبا مافيش) بعدد السيارت الأكسنت بنفس الحالة( عدد لا بأس به)، لكن الملاحظ ان اجزاء التعليق والجر فى اللانوس تتقدم بطلبات إعتزال بعد مدد خدمة اقل من مثيلاتها فى الهيونداى

(( منقول ))

27/02/2014

المحرك و هو من تصميم شركة نمساوية وتقفيل صينى ,سعة المحرك 1600 سى سى ونلاحظ فى المحرك بعض النقاط
ضعف السحب فى بداية التحرك من سرعة 0 الى 60 السحب يكون ضعيف جدا
ولكن من السرعة بعد 60 يكون السحب جيد جدا ولعلاج مشكلة ضعف السحب يفضل النقل على ار بى ام 3:4
استهلاك الوقود جيد جدا 7.5 لتر لكل 100 كيلو متر
الثبات
ثبات عالى جدا حتى 150 كيلو متر
الامان
ABS &EPDنظام فرامل متطور
نظام التعليق (العفشة) للسيارة اسبيرانزا
العفشة رياضية وان كان البعض يراها ناشفة ولكنها مفيدة جدا فى ثبات السيارة
صاج السيارة قوى جدا وتتحمل الخدمة الشاقة
تصميم السيارة
تتميز السيارة بمقدمة جميلة جدا ولكن يعيبها تصميم المؤخرة والذى لا يرضى الكثير من الناس ولكنها بالمجمل ذات تصميم جيد
تحظى السيارة بصالون فخم جدا ومتسع جدا لا يوجد فى السيارات المنافسة
الصالون مريح جدا فى السفر
الكنبة الخلفية واسعة جدا والجلوس عليها مريح جدا
اماكن التخزين متعدده
النظام الصوتى جيد جدا والكاسيت يو اس بي
التكيف جيد وبشاشة لمس
الكماليات
ريموت بأنذار ,وحده رفع للزجاج ,تحكم فى فتح الشنطه عن بعد وهو مقتبس من ريموت سكودا
يمتاز الزجاج بخاصية الاوتو داون وهى عبارة عن نزول الزجاج بضغطة واحدة
قفل اوتوماتيك للأنوار بعد 10 دقائق من النزول
كمبيوتر رحلات
رؤيه واضحه للعدادات
معرفه الباب المفتوح او الشنطه لو مفتوحه من خلال شاشه ديجيتال رائعة

27/02/2014

كشف تقرير مجلس معلومات سوق السيارات “الاميك” عن اعلى 10 ماركات مبيعات بالسوق المصرى منذ بداية 2013 وحتى نهاية مارس.

وتصدرت حلت شفروليه المركز الاول فى القائمة باجمالى 14.2 الف سيارة تلتها هيونداى بـ 6.5 الف ، ثم تويوتا بالمركز الثالث بـ 5 الاف سيارة ، وكيا رابعا بـ 4.1 الف سيارة ، وبالمركز الخامس متسوبيشى 2.8 الف سيارة ، و سوزوكى السادس ب 2.5 الف ، و رينو السابع بـ 2.5 الف سيارة

فيما سيطرت كينج لونج الصينية على المركز الثامن ب 1.3 الف سيارة تلتها شقيقتها الصينية الاخرى جولدن دراجون ب 1.2 الف سيارة .

والمفاجأة حققتها جيلى ام جراند الجديدة التابعة لوكالة شركة جى بى اوتو واستحوذت على المركز العاشر باجمالى 1.1 الف سيارة وذلك على حساب ماركات اخرى مثل اوبل و اسبيرانز .

27/02/2014

لسيارات الأوكتافيا وا فولكس فاجن .. مش بالضرورة تغير الفتيس لما يكون فيه عطل ..
(عدم نقل حركات الفتيس بانتظام وايضا رزعة قوية جدا او بمعنى اصح الراكب يشعر بالفتيس عندما يقوم بنقل الحركات وبعد فترة قليلة من ظهور ذالك العطل لم يتمكن الفتيس من الحركة تماما )

الحل يكون فى تغيير قطعة فى الفتيس تدعى علبة البلوف

27/02/2014