What are the opening hours?

Monday 10am - 10pm Tuesday 10am - 10pm Wednesday 10am - 10pm Thursday 10am - 10pm Friday 10am - 10pm Saturday 10am - 10pm

https://www.facebook.com/1194124230766112/

Alpha Mechanic, Cairo (2026)

09/03/2021

الترصيص (الحلقة الأولى) ؛

الترصيص واضح من اسمه أننا بنستخدم فيه رصاص بس يعني الترصيص؟ وليه بحتاجه ؟ وايه الأضرار الي ممكن تحصل لو معملتهوش؟ كل دي أسألة هنحاول نجاوب عليها أن شاء الله في اكتر من بوست.

مبدأيا كلنا عارفين أن الإطار بتاع العربية الطبيعي بتاعه انه يلف بشكل دائري تماما ولكن لو مثلا حصل خبطه في الجنط بتاع العربية في الحالة دي الإطار(الكاوتش+الجنط) هيبتدي أن حركته تتغير فبدل مايلف بشكل دائري هيبتدي أنه كمان ياخد حركه ترددية لفوق ولتحت(علشان الوزن على الإطار مابقاش متساوي في كل الاتجاهات) وده هيخلي الإطار وهو بيلف كمان عمال يتنطط وده بيؤدي لرعشة في جسم العربية وخصوصا الطارة على سرعات مختلفة على حسب مكان الإطار الي فيه المشكله.

في حالة وجود مشكلة زي دي بنتجه لعمليه الترصيص وهي اننا نشوف الوزن الزياده الي في الإطار متركز في انهي نقطة وندق رصاصه في الجنط عكس اتجاه الوزن الزياده فبكده بنعمل توازن في الإطار.

02/02/2021

معلومة ع الماشي:؛/

خد بالك لو لمبه في فانوس عربيتك اتحرقت وحبيت تغيرها لازم تتأكد أنها راكبة في مكانها صح لأنها لو راكبة غلط ممكن تسيحك الفانوس نفسه.

04/12/2020

الفرق بين الجنوط العادية والالمنيوم..؟

الجنوط الحديد /

1- شكلها تقليدي و مش بيتناسب مع كل العربيات وأشكالها قليلة ولكن في لو جنط عندك حصله مشكلة تقدر تستبدله بكل سهوله بحيث يكون ذي الجنط القديم.
- - - - - - - - - - - - - - - - - - - - - -
2- وزنها تقيل ودى بيفرق معاك في أكثر من حاجة مثلا استهلاك البنزين فيها بيكون أعلى من الجنوط الالومنيوم كمان بتقلل السحب بتاع العربية وبسبب وزنها بتكون حمل على مكونات العفشة وبتقلل من عمرها الافتراضي ولكن بسبب وزنها الكبير بتديك اكتر من ميزة منها الثبات على الطريق خصوصا في المطرة والثلج وبتدي اتزان مع الملفات.
- - - - - - - - - - - - - - - - - - - - - -
3- سعرها قليل مقارنة بالجنوط الالومنيوم وسعر إصلاحها لو حصل فيها حاجة يظل قليل جدا برضه.
- - - - - - - - - - - - - - - - - - - - - -
4- الجنوط الحديد مكوناتها الرئيسية بتكون غالبا حديد وكربون وده بيخليها معمرة جدا وممكن نقول إن عمرها من عمر العربية وكمان إصلاحها سهل جدا مقارنة بالجنوط الالومنيوم.
- - - - - - - - - - - - - - - - - - - - - -
5- بسبب التصميم بتاعها فللأسف مش بتعمل عمليه تبريد مناسبة للفرامل وده بيأثر على منظومة الفرامل خصوصا في الزحمة.
- - - - - - - - - - - - - - - - - - - - - -
6- الجنوط الحديد بتقدر تقاوم كل عوامل الطريق زي النقر الي بيحصل في الجنط من الحصى او حتى الهباب بتاع التيل وحتى الصدأ لو حصل غالبا بيكون في الطبقة الخارجية فقط وده سهل التنظيف و العزل من جديد.

الجنوط الالومنيوم /

1- شكلها احلى بكتير من الجنوط الحديد وبتناسب كل العربيات بس للاسف لو جنط عندك حصل فيه مشكلة صعب تلاقي واحد شبهه وممكن تضطر انك تغير طقم كامل او تجيبه بسعر غالي لأن الي بيبيعه بيبيع طقم على بعضه.
- - - - - - - - - - - - - - - - - - - - - -
2- وزنها خفيف وده بيديها مميزات كتير جدا زي استهلاك البنزين والسحب والتسارع بتاع العربية وخفيفة على العفشة وبتريحها في الطرق المكسرة ولكن على حساب الجنط نفسه.
- - - - - - - - - - - - - - - - - - - - - -
3- سعرها غالي جدا مقارنة بالجنوط الحديد ونادرا مابتتصلح ولو اتصلحت تكلفة إصلاحها بتكون عالية.
- - - - - - - - - - - - - - - - - - - - - -
4- الجنوط الالومنيوم مكوناتها الرئيسية غالبا بتكون الومنيوم ونيكل وماغنسيوم وده بيقلل عمرها الافتراضي وبيخليها ضعيفة جدا مع المطبات وممكن تتني منك بسهولة ولو مطب قوي ممكن الجنط يتشرخ واحيانا يتكسر وده بيخليك كل فترة محتاج تراجع ضغط الكاوتش عشان تحافظ على عمر الكاوتش.
- - - - - - - - - - - - - - - - - - - - - -
5- تصميمها زي ماقولنا بيكون جذاب جدا و بيعمل عمليه تبريد ممتازة للفرامل خصوصا في الزحمة ولكن بسبب التصميم المفتوح فده بيخليها عرضة للتني والكسر لان التصميم بيراعي الشكل على حساب المتانة.
- - - - - - - - - - - - - - - - - - - - - -
6- الجنوط الالومنيوم مابتصديش وبتكون متغطية كمان بطبقة حماية ولكن اول ما بتخدش أو بتروح بيبتدي يحصلها عمليه تاكل وده بيخليها مع الوقت تضعف وتتفتت وتكون عرضه للكسر.

07/07/2020

ازاي تخزن البطارية..؟

لو بتسافر كتير وخايف على البطارية الصح انك تفكها و تخزنها بطريقة سليمه وده الي هنشرحه النهارده ان شاء الله.

1- أتأكد الأول ان البطارية مشحونة بالكامل يعني يفضل لما تيجي تفكها تكون راجع من مشوار.
- - - - - - - - - - - - - -
2- هتفك الكابل السالب الأول (مهم جدا) وبعد كده تفك الكابل الموجب.
- - - - - - - - - - - - - -
3- هتنضف أطراف البطارية من اي صدأ او ملح وبعد كده هتحط شحم على الطرفين الموجب والسالب.
- - - - - - - - - - - - - -
4- هتخزن البطارية عدلة (يعني هتحطها بنفس الوضع الي كانت راكبة فيه في العربية) ويفضل انك تغطي الطرف الموجب بأي حاجة بلاستيك.
- - - - - - - - - - - - - -
6- هتخزن البطارية في مكان بارد (درجة حرارة الغرفة) ومايكونش في رطوبة.
- - - - - - - - - - - - - -
7- يتراجع على البطارية كل فترة 3 شهور مثلا ولو اكتشفت أنها محتاجة شحن تشحنها.

30/06/2020

معلومة ع الماشي:؛!

اياك تشغل المساحات على الناشف حاول على قد ماتقدر انك تبل الزجاج الاول عن طريق الرشاشات علشان متتقطعش (خد بالك التراب الناعم الي على الزجاج بيقطع الكاوتشة الي على المساحه ذي الموس) وتعمل معاك خطوط ويبقى وجودها ذي عدمه.

29/06/2020

البنزين (الحلقة الثالثة)؛

ليه ما احطش بنزين 80 ؟

لو عربيتك مصممة انها تشتغل على بنزين 92 او 95 اياك تحطلها بنزين رقمه اقل، ذي ما اتكلمنا في بوستات قبل كده ان رقم الاوكتان مهم جدا في تصميم اي محرك لان كل ما الرقم ده بيزيد احتمالية ان الحريق يحصل قبل ميعاده بتقل جدا ود بيحافظ على العمر الافتراضي للموتور على وجه الخصوص والعربية ككل لاكتر من سبب خلينا نستعرض اهمهم /

1- لو الحريق حصل قبل ميعاده مع الوقت هيسلخ الشميز (الغرفة الأسطوانيه الي بيتحرك فيها البستم) بتاع الموتور ومع الوقت هتحتاج تعمر الموتور بدري.
- - - - - - - - - - - - - - - - - -
2- لو الحريق حصل قبل ميعاده هيعمل حمل زيادة على السبايك بتاعت البيلات (البيل هو الدراع الي بيوصل البستم بالكرنك) وكمان حمل على السبايك بتاعت الكرنك نفسه وهيسلخها وهتحتاج تعمر الموتور بدري.
- - - - - - - - - - - - - - - - - -
3- لو الحريق حصل قبل ميعاده درجة حرارة الموتور هتزبد وبالتالي هتعمل حمل مضاعف على دورة التبريد بتاعت الموتور سواء كانت الخاصه بالمياه او الزيت.
- - - - - - - - - - - - - - - - - -
4- لو الحريق حصل قبل ميعاده الكمبيوتر بتاع العربيه هيبتدي انه يحس ان فيه مشكله وهيقلل كميه البنزين الي بتخش الموتور وده هيوفر معاك بنزين بصوره مؤقته لكنه هيعمل اكتر من مشكله هيضعف السحب جدا و هيسخن العربية وهيبوظ البوجيهات وغالبا هيبوظلك حساس الشكمان وهيخلي العربية تجيب كاوتش صباب.
- - - - - - - - - - - - - - - - - -
5- كل البنزيمات عارفه ان الي بيحط بنزين 80 هي العربيات القديمه الي شغاله كاربيراتير فمش بيهتموا بنظافه البنزين فغالبا هتلاقي في البنزين رواسب او هتلاقيه مخلط بجاز او حتى فيه نسبه مياه وده حرفيا هيبوظ طلمبه البنزين والرشاشات وعلبه الشكمان ووراد جدا لو صادفت معاك انه في مياه يبوظلك الموتور بعد ماتطلع من البنزيمه ب5 دقايق.
- - - - - - - - - - - - - - - - - -
6- لو الحريق حصل قبل ميعاده قواعد الموتور عندك هتتقطع في وقت قياسي.
- - - - - - - - - - - - - - - - - -
7- هتعمل حمل زياده على البطارية في بداية التشغيل.

ملحوظة :
اقل ضرر ممكن يحصل للعربية لو حطيت بنزين 80 في حالة الدوسة الثابته على دواسة البنزبن يعني في السفر مع السرعه الثابته المنتظمة اما اكتر ضرر ممكن يحصلك من بنزين 80 هيكون في الزحمة مع السرعات غير المنتظمة.

لو عجبك البوست اعمل اب وشير علشان غيرك يستفيد (الفا ميكانيك).

17/06/2020

المقص (الحلقة الثانية) :

اتكلمنا المرة الي فاتت عن المقص ووظيفته وعرفنا أنه جزء مهم جدا من أجزاء العفشة خلينا النهارده ان شاء الله نستعرض مع بعض ايه أكتر الأسباب شيوعا الي بتؤدي الي تلف المقص وبتقلل عمره الافتراضي ؛

1- مبدأيا المقص في حد ذاته جزء معدن مش بيبوظ بسهوله الا في حالة انك عملت حادثة لا قدر الله، إنما الي بيبوظ فيه هو الجلب بتاعته.
- - - - - - - - - - - - - - - - - - -
2- جلب المقص هي الجزء الكاوتش الي بيكون راكب في المقص علشان تديله مساحه أنه يتحرك لفوق ولتحت مع المطبات وتقلل معدل الاحتكاك وتمتص جزء من الصدمة.
- - - - - - - - - - - - - - - - - - -
3- جلب المقص زيها زي اي كوتش أما أنه بيبوظ نتيجة للاستخدام او نتيجة لعامل الزمن (يعني ممكن تركن العربية لفترة من الزمن وتكتشف ان الجلب كلها شققت وبدأت أنها تتقطع).
- - - - - - - - - - - - - - - - - - -
4- من اكتر الأسباب الي بتؤدي لتلف جلب المقصات في فترة زمنية قليلة جدا هي الفرملة المفاجأة او العنيفة لانها بتضيف وزن كبير جدا على المقص نتيجة للقصور الذاتي.
- - - - - - - - - - - - - - - - - - -
6- خد بالك من المطبات العالية وإياك تفرمل اول ما توصل عندها دايما فرمل قبلها بمسافة مناسبه لأن خبطة الكاوتش في المطب بصورة عنيفة ممكن تخرج جلبه المقص من مكانها مش بس تقطعها.
- - - - - - - - - - - - - - - - - - -
7- خد بالك من الطرق المائلة على سبيل المثال الفرملة الشديدة في نزلة كبري مثلا تاثيرها سيئ جدا مش بس على المقصات لأ كمان على منظومة الفرامل والكاوتش.
- - - - - - - - - - - - - - - - - - -
8- من الحاجات المهمة الي لازم نكون عارفينها ان المطبات والنقر وكتر المشي على طرق غير ممهدة ده برضه بيقلل العمر الافتراضي لكل مكونات العفشة بغض النظر عن تأثيره المباشر على المقص.
- - - - - - - - - - - - - - - - - - -
9- في عوامل تانيه بتقلل العمر الافتراضي لجلب المقصات زي ارتفاع درجة الحرارة او الرطوبة او الأحمال الزيادة او تعديل مقاس الكاوتش والجنوط بطريقة لا تتناسب مع عفشة السيارة.

لو عجبك البوست اعمل آب وشير علشان غيرك يستفيد (الفا ميكانيك)

04/06/2020

المقص (الحلقة الاولى) :

هنتكلم النهارده ان شاء الله عن واحد من أهم مكونات منظومة العفشة في السيارة وهو المقص وسبب ان انا أبدأ بيه لأنه مش بس مهم في العفشة الا انه بيتعبر جزء مهم من أجزاء الأمان في السيارة ولا يقل اهميه عن تيل الفرامل او حتى الايرباج.

ايه هو المقص..؟
المقص هو عبارة عن جزء معدني غالبا بيكون على شكل حرف A وهو حلقة الوصل بين عجلة السيارة وجسم العربية نفسه يعني باختصار هو الي مثبت العجلة في الشاسيه بتاع العربية.

وظيفة المقص /
المقص ليه أكتر من وظيفة خلينا نستعرض مع بعض اهمهم؛

1- المقص بيرتكز عليه وزن العربية نفسه وده من الأسباب الي بتخليه عنصر مهم جدا وأي مشكلة فيه بتلخبط العربية كلها.
2- المقص من اول الأجزاء الي بتمتص الصدمات من المطبات والطرق غير الممهدة يعني أهميته لا تقل عن المساعد في النقطة دي.
3- المقص بيمنع العجلة أنها تتحرك للامام او للخلف وده مهم جدا خصوصا في الفرامل المفاجأة او التسارع الفجائي (أقصد هنا ان العجلة ترحل كلها من مكانها يعني تقرب من كرتيرة التراب او تبعد عنها).
4- المقص بيمنع العجلة أنها تنزل تحت العربية او تطلع برة العربية(أقصد هنا ان العجلة ما تكونش واقفة بزاوية قائمة على الأرض ولكن فيها نسبة ميل كبير للداخل أو للخارج).
5- المقص هو الي بيشيل قوة اندفاع الهواء الي بيخبط من جنب العربية (الهواء الي بيخبط في جسم العربية من الجنب تأثيره قوي جدي تخيل انك بتجري وواحد خبطك خبطة بسيطة في كتفك هتقع) وبالتالي بيمنع العومان الي بيحصل نتيجة الهواء وبيعمل نعومة مع المنعطفات والملفات.

10/02/2020

سويتش الفرامل (Brake Switch) :

هنتكلم النهارده ان شاء الله عن سويتش الفرامل وبالرغم من انه حاجه مش مشهورة في مجال اعطال السيارات الا انه مهم جدا وممكن يلخبطلك العربية كلها.
- - - - - - - - - - - -
سويتش الفرامل زي ماهو واضح من اسمه هو سويتش بيكون راكب فوق بدال الفرامل وليه اكتر من وظيفة خلينا نراجع عليهم /

١- اول ماتدوس فرامل بينور معاك لمبات الاستوب الخلفية وبكده الشخص الي وراك يعرف انك دايس فرامل فيبتدي يهدي هو كمان.

٢- في العربيات الاوتوماتيك بيفتح اللوك بتاع عصاية الفتيس فحضرتك تقدر انك تحركها من وضع P الي وضع D.

٣- بيبعت إشارة لكنترول العربية انك عايز توقف العربية وبناء عليه الكمبيوتر بيبتدي انه يعمل اكتر من حاجة.
- - - - - - - - - - - -
ايه المشاكل الي ممكن يعملها سويتش الفرامل /

١- هيفصل نور الاستوب الخلفي او يشغله علطول يعني الشخص الي وراك مش هيبقى عارف انك دايس فرامل فطبيعي ان احتمالية ان حد يخبطك من ورا تزيد جدا.

٢- لو عربيتك اوتوماتيك هتلاقي عصاية الفتيس بتعلق وساعات هتلاقيها رافضه انها تتحرك وتجيب الغيارات.

٣- في حالة دوسة الفرامل الكمبيوتر بتاع العربية بيبتدي انه يفهم انك عايز توقف العربية وفي الحالة دي بيقلل نسبة البنزين الي داخلة الموتور وكمان بيسقط نقلة من على الفتيس علشان يوقف العربية بسرعة فلو الإشارة الي جاية من سويتش الفرامل جاية غلط في حالة دي هيحصل معاك ضعف ملحوظ في السحب وكتمة شديدة وهتلاقي الار بي ام بيعلى جدا والعربية مش عايزه تنقل نتيجة للخبطة الي بتحصل في الغيارات.

٤- لو سويتش الفرامل فيه مشكلة اي منظومة ليها علاقة بالفرامل هيحصل فيها لخبطة بمعنى ان ABS على سبيل المثال مش هيشتغل لانه ببساطة المصدر بتاعه الي بيعرفه انك بتدوس فرامل هو سويتش الفرامل.

٥- لو عربيتك بصمة العربية مش هتدور.

٦- لو بتستخدم مثبت السرعة وحبيت تفصله مش هيفصل لانه مش هيحس بدوسة الفرامل بتاعتك (وأحيانا مثبت السرعة مش هيشتغل أصلا) .

لو عجبك البوست اعمل اب وشير علشان غيرك يستفيد (ألفا ميكانيك).

07/02/2020

المثلث العاكس :

في حاجة شدت انتباهي في الفترة الأخيرة ان الناس مش بتستخدم المثلث العاكس اطلاقا وحتى الي بيطلعه من العربية بيستخدمه بطريقة خاطئة تماما والي قدرت استنتجه ان معظم الناس مش فاهمة اهميته ولا حتى وظيفته اصلا، خلينا كده النهارده نراجع مع بعض شوية معلومات هتفيدكم وهتفتح عينيكم على اكتر من حاجة.
- - - - - - - - - - -
المثلث العاكس عبارة عن مثلث مصنوع من مادة عاكسة للضوء بيستخدم بواسطة اي سائق على الطريق لتحذير باقي سائقي السيارات بتوخي الحذر لوجود مشكلة ما على امتداد الطريق.
- - - - - - - - - - -
المثلث العاكس لا يقتصر استخدامه على صاحب المشكلة اي سائق يشوف مشكلة على الطريق تستدعي استخدام المثلث العاكس لازم يستخدمه علشان يحذر باقي السائقين (على فكرة انك تضحي بمثلث و بخمس دقايق من وقتك دي حاجة زهيدة في مقابل انك تمنع حادثة او تنقذ حياة بني ادم).
- - - - - - - - - - -
بيتم استخدام المثلث العاكس في حالة تعرضك لحادث على الطريق او تعطل السيارة لاي سبب سواء كان فردة كاوتش او بطارية او العربية سخنت.
- - - - - - - - - - -
بيتم استخدام المثلث العاكس صباحا ومساءا ولايقتصر استخدامه على فترة المساء فقط يعني اهميته الصبح لاتقل عن اهميته بالليل طالما العربية عطلت لازم تستخدمه.
- - - - - - - - - - -
نيجي بقى لاهم نقطة طريقة استخدامه، تقريبا مفيش حد شوفته على الطريق بيستخدم المثلث العاكس بطريقة صحيحة/

1- لو الطريق اتجاه واحد المفروض المثلث يتحط ورا العربية بمسافة كافية اقل حاجة 40 خطوة من مكان العربية.

2- لو الطريق اتجاهين بمعنى انه رايح جاي هتحط مثلث ورا العربية ومثلث امام العربية بمسافة كافية اقل حاجة 100 خطوة.

3- لو واقف في نزلة كوبري او في دوران بمعنى ان العربيات الي جاية محتاجة وقت اكتر علشان تتصرف او في ملف بيعيق رؤيتهم في الحالة دي هتحط مثلث بعيد عنك حوالي 350 خطوة ولو الملف قريب منك يفضل تحط المثلث عنده وبعد كده تحط مثلث تاني بعيد عن العربية حوالي 100 خطوة.
- - - - - - - - - - -
ملاحظات/

1- يفضل ان يكون معاك اكثر من مثلث وتحطهم على مسافات مختلفة (الهدف من المثلث مش ان الي جاي عليك يشوفه ولكن يشوفه ويلحق يتصرف ماينفعش تلزق المثلث في ظهر العربية علشان خايف ان حد يخبطه هو اصلا معمول علشان الناس تخبط فيه وتلحق نفسها قبل ماتخبطك انت شخصيا).

2- قبل ماتنزل تحط المثلث تشغل الانتظار.

3- وانت رايح تحط المثلث حاول على قد ماتقدر تبعد عن الحارة بتاعت الطريق (يعني لو الطريق جنبه رمله تمشي عليها لحد ماتوصل للنطقة الي هتحط عندها المثلث ولو على كوبري مثلا حاول انك حرفيا تكون لازق في السور بتاع الكوبري).

4- يفضل يكون معاك جاكت من الي بينور في الضلمة وانت بتحط المثلث ويفضل طبعا انك تحاول تلفت الانتباه على قد ماتقدر وانت بتركب المثلث علشان محدش يخبطك.

لو عجبك البوست اعمل اب وشير علشان غيرك يستفيد (الفا ميكانيك)

05/02/2020

حساس الحرارة :

يعتبر حساس الحرارة اهم الحساسات الموجودة في العربية بعد حساس الكرنك لانه ببساطة بيفهم الكمبيوتر درجة حرارة الموتور عاملة ازاي ، وعلشان كده هنحاول النهارده ان شاء الله اننا نتعرف على وظيفته والمشاكل الي ممكن يسببها في حالة تعرضه للتلف.
- - - - - - - - - - - - - -
حساس الحرارة غالبا بيكون موجود جنب كوعة الثرموثتات وفي بعض العربيات بيكون راكب فيها في وش السلندر.
- - - - - - - - - - - - - -
الوظيفة الرئيسية لحساس الحرارة انه يقيس درجة حرارة المحرك الداخلية ويبعتها للكنترول بتاع العربية وبناءا عليه الكنترول بيبتدي انه يتصرف /

1- لو حساس الحرارة بعت للكمبيوتر ان العربية باردة في حالة دي الكمبيوتر هيحرق بنزين بزيادة علشان يسخن العربية بسرعة.
2- لو حساس الحرارة بعت للكمبيوتر ان العربية اعلى من درجة حرارة التشغيل في الحالة دي الكمبيوتر هيبتدي انه يشغل المراوح.
3- لو حساس الحرارة بعت للكمبيوتر ان العربية سخنة جدا في الحالة دي الكمبيوتر هيبتدي انه يشغل المراوح على اعلى سرعة ويفصل اي حاجة ممكن انها تكون حمل على الموتور زي التكييف مثلا وينور معاك لمبه على التابلوه او هتسمع صوت صفارة.
- - - - - - - - - - - - - -
المشاكل الي ممكن يسببها حساس الحرارة/

1- هيديك قرايات غلط على لوحة العدادات وغالبا هينور معاك لمبة الاعطال.
2- الحساس لو قاري ان العربية سخنة وهي باردة في الحالة دي هيرفع معاك استهلاك البنزين جدا وهيبوظ البوجيهات وممكن تلاقي دخنة سوداء طالعة من الشكمان او هيخلي العربية تقطع وماتبقاش عايزة تدور.
3- الحساس لو قاري ان العربية باردة وهي سخنة في حالة دي درجة حرارة الموتور هتزيد جدا وممكن تحصلك مشاكل في دورة التبريد او ان العربية تجيب منك جوان وش سلندر.
- - - - - - - - - - - - - -
حساس الحرارة من الحساسات المهمة جدا وغالبا بيكون عمره الافتراضي كبير ولكن عدم الانتظام في تغيير مياه التبريد او انك تحط مياه من الحنفية فده بيسبب تلفه في فترة صغيرة.

لو عجبك البوست اعمل اب وشير علشان غيرك يستفيد (فريق الفا ميكانيك).

12/01/2020

معلومة ع الماشي؛:/

بتشتري عربية جديدة وعايز تعرف تاريخ صنعها🤔؟
بتشتري عربية مستعملة وعايز تعرف موديلها كام☹️؟
عجبتك عربية في الشارع وعايز تعرف موديل كام🤨؟

بص ياكبير لا هقولك بص على رقم شاسيه ولا هقولك خش على النت كل الي عليك انك تروح على زجاج الباب الأمامي او حتى الخلفي مش هتفرق، اخر حته في الزجاج من تحت هتلاقيه مكتوب عليها رقم هو ده تاريخ صنع العربية.

على سبيل المثال لو العربية ٢٠١٩ هتلاقي الرقم ده اما 09... او 19...

لو عجبك البوست اعمل اب وشير (ألفا ميكانيك)

Alpha Mechanic

09/03/2021

02/02/2021

04/12/2020

07/07/2020

30/06/2020

29/06/2020

17/06/2020

04/06/2020

10/02/2020

07/02/2020

05/02/2020

12/01/2020

Address

Opening Hours

Website

Alerts

Contact The Business

Shortcuts

Share

Category

Monday	10am - 10pm
Tuesday	10am - 10pm
Wednesday	10am - 10pm
Thursday	10am - 10pm
Friday	10am - 10pm
Saturday	10am - 10pm