27/01/2017
لما تدخل تمون في محطة البنزين ..أوعى تفول لحد فتحة التانك ( الزور ) ..لكن أطلب تفول على أول فصله ( اول تكه ف المسدس )
يعني إيه الكلام دة ؟؟
يعني تطلب من عامل المحطة أنة يمتنع عن ضخ البنزين لما المسدس يفصل أوتوماتيك من اول مره
طب اية السبب ؟؟
أولا: عوامة طرمبة البنزين لازم تطفو على سطح البنزين لإعطائك قراءة دقيقة عن مستوى البنزين في التانك و طبعا لما يزيد المستوى عن الطبيعي دا هيتسبب في طفو العوامة على أقصى درجة لسوستة العوامة و مع الوقت ممكن تضعف السوستة دي و تبدأ تشوف قراءات مش دقيقة لمستوى البنزين و غير معبرة عن الكمية الفعلية.
ثانيا: هو المسدس بيعرف إزاي أن التانك أمتلأ فيفصل لوحدة؟؟
بص يا سيدي .. قبل فتحة خروج البنزين من المسدس فيه فتحة متصلة بأنبوبة شغلتها تشفط هوا أو البخار الناتج أثناء ضخ البنزين و لما بيوصل مستوى البنزين لأخر التانك .بيدخل في الفتحة الموجودة اللى في المسدس و يمشى في الأنبوبة لحد ما بيوصل لفالف بيحس بإختلاف كثافة البنزين عن الهوا فبيقفل المسدس أوتوماتيك .
النقطة هنا أن الخاصية دي معمولة كمان علشان يحافظوا على البنزين من انة يتهدر في الأرض لما التانك يتملى و يقدر يرجعة تاني لخزانات المحطة .
فطبعا لما تحاول تكمل ملى للتانك بعد ما المسدس يفصل .. أنت ممكن تدفع ثمن بنزين مدخلش التانك بتاعك أصلا و كل الموضوع إنة عدى على عداد المضخة و خرج من فتحة المسدس و دخل في أنبوب الهوا و رجع الخزانات تاني و بسبب الموضوع دة ممكن تلاقي نفسك أوقات بتحط كمية أكبر و تدفع أكتر لبنزين رجع للمحطة تاني.
ثالثا: كل ما الضخ كان أسرع .. كان البخار الناتج من الضخ أكثر فهيرجع بنزين أكتر للمحطة و طبعا بعد ماتكون دفعت تمنة لأنة عدى على العداد.
رابعا: لما درجة الحرارة تبقى عالية . كثافة البنزين بتقل و دا بيخليك لما تمون في الجو الحار تاخد بنزين كثافتة أقل . يعني تدفع تمن لتر بس الكمية أقل من لتر بقليل لذلك يفضل إنك تمون أثناء الليل أو في الجو البارد
