03/07/2026
الغلطة اللي ممكن تؤدي الي كارثة لو الكاوتش فرقع وانت ماشي على 120 هي إنك تدوس فرامل جامد أو تشد الهاند بريك مرة واحدة. دي الغريزة، بس هي أخطر حاجة.
الكاوتش لما يفرقع العربية بتتهز جامد وبتميل ناحية العجلة اللي فرقعت. لو دوست فرامل هتلاقيها لفت منك أو اتقلبت لا قدر الله، لأن العجلة دي خلاص مافيهاش تماسك.
الصح تعمل إيه:
أول حاجة امسك الدركسيون بإيديك الاتنين وجامد. اثبت عليه وما تفضلش تهزه يمين وشمال، خلي العربية ماشية مستقيم على قد ما تقدر.
تاني حاجة شيل رجلك من على البنزين بشويش. سيبها تهدى لوحدها، ما تشيلش رجلك مرة واحدة ولا تدوس بنزين.
تالت حاجة إوعى تيجي جنب الفرامل في الأول خالص. استنى لما السرعة تنزل معاك لحد 60 أو 70، ساعتها بس دوس فرامل خفيف خالص وانزل واحدة واحدة على كتف الطريق.
رابع حاجة شغل الانتظار عشان اللي وراك ياخد باله إن عندك مشكلة.
ولما تقف، نزل الناس بعيد عن الطريق، وحط المثلث على بعد كويس، وكلم النجدة.
في الصيف الحر ده الكاوتش بيبقى ضغطه عالي، فقبل ما تسافر بص على ضغط الهوا، خليه 32 مثلاً، او حسب توصيات الشركة المصنعة ، وشوف لو في تشققات أو بلالين في الكاوتش.
احفظها كده: امسك الدركسيون، سيب البنزين، ولما تهدى انزل بالراحة.
