26/05/2026
Özümölüm, bir gün beynim çönəcək, bir də baxasınız yazmışam ki, yaşı 20-dən artıq olan maşınlara baxmırıq. Düzdür, deyəcəksiniz ki, buna bax, yenə şişdi. Amma dədəmin goru haqqı elə deyil. Hamı bilir ki, mən heç zaman yazılarımda, işimə yanaşmamda səmimiyyətimdən yayınmamışam. İnanın səmimiyyətimə ki, adamı həyatdan küsdürürlər. Sənətə nifrət elətdirirlər. Deməli, bir qardaş 4 gün qabaq gəlib ki, "qardaş, bu maşının sürətlər qutusunu (karobkasını) sökün, problemi var". Biz də sökmüşük. Problemi aşkarlamışıq. "Qardaş, filan ehtiyat hissəsini al gətir, dəyişək, problem həll olsun" demişik. Nə başınızı ağrıdım, qardaş axtarır, biz də ona qoşulub axtarırıq. Cəmi bir yerdə tapılır, o da həm orijinaldır, həm də baha. İndi sürücü də deyir ki: "Yox ey, qardaş, mənim ona gücüm çatmır". Götürüb başqa ustaya da zəng edib məsləhət alır. O usta da deyir ki: "Yox ey, o detal dəyişməsə də məsələ həll olar". Nəsə, nə başınızı ağrıdım, dirənir bizim ustaya ki, "sən o detalı dəyişmədən yığ getsin". Usta da yığır, pulunu alır, sonucda yenə maşın düzəlmir. İndi də sürücü, rəhmətlik nənəm demişkən, tumanını başına çəkib ki, "mənim maşınım düzəlmədi, bəs mənim pulumu boş yerə aldınız". Gəl indi buna başa sal ki... Ay müəllim (Qeyd edim ki, içimdəki səs müəllim demir. Mədəni çıxsın deyə müəllim yazdım. Siz içimdəki ən p*s ifadəni düşünə bilərsiniz):
Maddi durumun aşağıdırsa, ümumiyyətlə maşın sürmə.
Maşını ustaya gətirəndə çıxa biləcək xarab ehtiyat hissəsini almağı düşünməlisən.
Kənardan məsləhət aldığın o usta elə yaxşı ustadırsa, bəs bizə niyə gətirirdin, elə ora aparardın.
Ustanın heç kimin dədəsinə borcu yoxdur ki, nəyisə sökə və sənin ona hissə almağa gücün çatmaya, usta da təkrar yerinə yığa və ödəniş almaya.
Çatan-çatan da deyir ki: "Yox ey, siz istəməzsiniz ki, biz sosial şəbəkədə sizin haqqınızda p*s nəsə yazaq və ya deyək".
İnanın Allaha, dəli əlində qalmışıq. Belə hallar tez-tez olmasa da, arada-sırada olur. Əsasən də köhnə maşın sürən və maddi imkanı zəif olan sürücülərlə. Düzdür, hamısı elə deyil, adam gərək düzgün danışa. Amma inanın ki, 80% bu tip sürücülər adama zülm verən insanlardır. Adam başa da sala bilmir ki, sənin maşını düzəltmək üçün imkanının olmamağında, vallah, günahkar mən deyiləm.
İndi bu yazımı oxuyan bir çox adamın bu sözlərimə görə məndən açığı gələcək. Bəlkə də müştərimiz olduğu halda bizi tərk də edəcək. Amma rəhmətlik Anton Çexovun bir yaxşı sözü var. Deyir “İnsanlara həqiqəti demək bəzən onları itirmək deməkdir.” İndi siz də bir insan olaraq , bir Azərbaycanlı olaraq mənim dərdimi başa düşmürsünzə elə sizi itirsəm yaxşıdı.
