15/10/2017
حساس الشكمان
المشكله والعلاج ...
بسم الله
انهارده بأذن الله هنتكلم عن حساس من اهم الحساسات المسئوله عن أداء السياره وايضا عن استهلاكها للبنزين
وهو حساس الشكمان او ( O2 SENSOR )
فين مكانه ؟
وهو موجود فى اغلب السيارات الحديثه الأنجكشن والهاف انجكشن وبيبقى راكب دايما فى اول فرن الشكمان
وكمان فى عربيات بيبقى فيها اتنين حساس شكمان والتانى بيبقى قبل علبه الشكمان الأولى
هل فى منه انواع ؟
فيه منه نوعين
1 حساس بدون سخان ( بطرف سلك واحد وبيبدأ عمله بعد ما الموتور يوصل لدرجة حرارة التشغيل الطبيعيه )
2 حساس مذود بسخان ( وده اربعه طرف ويبدأ عمله فور فتح الكونتاك )
طيب اصلا هو ايه وظيفته ؟
الحساس ده بيقوم بدور المتذوق للطعام
ولاكن فى الموتور
هو متذوق للعادم
بمعنى
انه بيقيس نوعية الحريق
1 غنى ( يعنى نسبة البنزين فى الخليط المحروق اكتر من النسبه العياريه )
وهنا بيدى قرايه للكومبيوتر فالكومبيوتر يدى اوامر للرشاشات تقلل فترة ضخ البنزين لتعديل نسبة الخليط المحروق
2 فقير ( يعنى نسبة البنزين فى الخليط المحروق اقل من النسبه العياريه )
وهنا بيدى قرايه للكومبيوتر فالكومبيوتر يدى اوامر للرشاشات تذود فترة ضخ البنزين لتعديل نسبة الخليط المحروق
طيب ايه هى اعراض تلفه ؟
الاعراض
1 لمبة التشيك او الموتور بتنور على سرعة من 100 الى 120 كيلو
2 استهلاك بنزين غبى ( الصفيحه بتعمل 130 كيلو )
3 البوجيهات بتطلع سوداء مهببه
4 هباب اسود على ديل الشكمان
طيب ايه اسباب تلفه ؟
1 سوء تصنيع
2 انتهاء عمره الأفتراضى
3 ردائة نوعية البنزين
4 رشاشات تالفه
5 موتور مفوت فبيرمى عليه زيت مع العادم
دى كانت أسباب تلفه
طيب وايه العلاج ؟
1 بنتأكد من تلفه بأننا نحط العربيه على الاسكانر علشان نتأكد (ب 30 جنيه )
2 هتغير الحساس فى التوكيل ( 350 حساس + 50 مصنعيه + طقم بوجيهات ب70 جنيه )
ده طبعا غير انهم هيفكو الفرن يطلعوه بره يعنى اكيد هيقولك جوانات فرن
يعنى عوار جامد طيب ايه الحل ؟
من هنا يبدأ موضوعنا
طبعا والعربيه بارده تلاجه
اول حاجه هنفك القطاش السالب من البطاريه
و ( بسم الله )
نبدأ الشغل
هنجيب حساس شكمان اصلى من بره التوكيل
صوره رقم ( 1 )
وجبت مفتاح 22 مم مشنشر ب ( 12 جنيه )
وروحت اقصه نصين ومرفع وشه شويه على الجلخ علشان يبات مكانه لان المكان ضيق حبتين
صوره رقم ( 2 )
وبعدين هنفك مروحه التكييف بمفتاح 12مم مسمارين من فوق وبعدين نسحبها لفوق هتطلع معاك وبعدين نفك فيشة الكهرباء بتعتها ونطلع المروحه بره خالص
صوره رقم ( 3 )
بعد كده هنفك غطاء الفرن 3 مسامير 12 مم ونطلعه بره وهو الصاجه اللى بتلمع تحت البوجيهات
هيبقى ده المنظر قدامنا
صوره رقم ( 4 )
نيجى بقه للجد
هنفك فيشة حساس الشكمان اللى هيا من السلك البنفسجى اللى طالع من تحت الفرن
وبعدين ندخل السلك جوه المفتاح وبعدين نبيت المفتاح على الحساس ونبداء نشد المفتاح لفوق عشان نحل و ميمنعش لو حطينا شوية WD-40 او زيت باكم علشان نعرف نحل
صوره رقم ( 5 )
صوره رقم ( 6 )
مبروك احنا كده حلينا الحساس وده كان الجزء الصعب
صوره بقى للحساس القديم والجديد علشان نشوف الفرق
صوره رقم ( 7 )
هنضف بقه مكانه و نبدأ نعيد الخطوات عكس ما بدأنا
بس استنى
مش هنركب غطأء الفرن دلوقتى
هنفك سلوك البوجيهات بالعقل واحده واحده
وبعدين هنفك البوجيهات و نضف مكانها
صوره رقم ( 8 )
صوره للبوجيه القديم والجديد عشان نشوف الحساس البايظ كان عامل ايه
صوره رقم ( 9 )
نركب البوجيهات الجديده ونقفل غطاء الفرن ونلم كل عدتنا كويس ومننساش حاجه
وبعدين نوصل القطاش السالب للبطاريه اللى كنا فكينو فى الاول خالص فكرينه ؟
كده كله تمام
نيجى بقه للايدل ليرن
1 هنفتح الكونتاكت 5 ثوانى بدون دواره ونقفله 5 ثوانى
2 هنفتح الكونتاكت 5 ثوانى بدون دواره ونقفله 5 ثوانى
3 هنفتح الكونتاكت 5 ثوانى بدون دواره ونقفله 5 ثوانى
4 هندور العربيه على السلانسيه بدون تشغيل اى احمال ( نور , تكييف , كاسيت ) لمدة 3 دقايق
5 هنشغل التكييف على درجة 4 فريون + النور العالى + الشبوره ( يعنى كل الاحمال ) لمدة 2 دقيقه
6 هنطفى كل الاحمال الاول وبعدين نطفى العربيه
وكده يبقى كله تمام
ولو نال الموضوع رضاكم ارجو ان لا تنسونى من صالح دعائكم
وطبعا تسجلوا اعجابكم بالموضوع والصفحه
وتشيروا الموضوع على صفحاتكم والجروبات المتخصصه
اخوكم
عصام غنايم
لا يتوفر نص بديل تلقائي.
لا يتوفر نص بديل تلقائي.
لا يتوفر نص بديل تلقائي.
لا يتوفر نص بديل تلقائي.
