12/05/2025
⁉️အင်ဂျင်ဝိုင် ဘာကြောင့်လျော့တာလဲ⁉️
ကားအင်ဂျင်ရဲ့ ချောဆီပေးစနစ် (Lubrication System) မှာအသုံးပြုတဲ့ အင်ဂျင်ဝိုင်တွေက ပုံမှန်အတိုင်း (ပြစ်ချက်မရှိ) ဆိုရင်လည်း ပမာဏနည်းနည်းတော့လျော့လေ့ရှိပါတယ်။ ဒါပေမယ့် အင်ဂျင်မှာ ပြစ်ချက်ရှိခြင်း (သို့မဟုတ်) အသုံးပြုတဲ့ အင်ဂျင်ဝိုင်ဂရိတ်နှင့်အရည်သွေးကြောင့်လည်း အင်ဂျင်ဝိုင် လျော့စေနိုင်ပါတယ်။ အင်ဂျင်ဝိုင်လျော့စေနိုင်တဲ့ အကြောင်းများစွာထဲက အဖြစ်များတဲ့ ပြစ်ချက်တွေကတော့
၁။ အင်ဂျင်အတွင်း လောင်ကျွမ်းခြင်း
၂။ အင်ဂျင်အပြင်ဘက်သို့ စိမ့်ထွက်ခြင်း
၃။ အင်ဂျင်ဝိုင် အရည်အသွေးမပြည့်ခြင်းနှင့် SAE Grade လွဲမှားစွာအသုံးပြုခြင်း
၄။ အင်ဂျင်ဒီဇိုင်းအရ အနည်းငယ်လျော့ခြင်း
၁။ အင်ဂျင်အတွင်း လောင်ကျွမ်းခြင်း
ပစ်စတင်ရိန်းများကြောင့် အင်ဂျင်ဝိုင်များ မီးလောင်ခန်း (Combustion Chamber) အတွင်း ရောက်ရှိကာ လောင်ကျွမ်းခြင်း နှင့် ဗားဆီးလ် (Valve Seal) များ ပျက်စီးခြင်းကြောင့် အင်ဂျင်ဝိုင်ကို မထိန်းနိူင်၍ မီးလောင်ခန်း (Combustion Chamber) အတွင်းသို့ စိမ့်ဝင်ကာ လောင်ကျွမ်းနိူင်ပါတယ်။ တာဘိုချာချာပါသောကားများတွင် တာဘိုချာချာမှ အင်ဂျင်ဝိုင်ယိုစိမ့်မှုကြောင့်လည်း အင်ဂျင်ဝိုင်လျော့နိူင်ပါတယ်။
၂။ အင်ဂျင်အပြင်ဘက်သို့ စိမ့်ထွက်ခြင်း
အင်ဂျင်အပြင်ဘက်သို့ အင်ဂျင်ဝိုင် စိမ့်ထွက်နိူင်သောနေရာများမှာ
- တိုက်ပစ်ဖုံး (Tapped Oil Seal) မလုံခြင်း
- ချိန်းကာဗာ (Timing Chain Cover) မလုံခြင်း
- ကရိုင်းရှပ် မိန်း ဝိုင်ဆီးလ် (Crankshaft Oil Seal)
- ကမ်မရှပ် ဝိုင်ဆီးလ်(Camshaft Oil Seal)
- အင်ဂျင်ဝိုင်ဖစ်တာ (Engine Oil Filter)
- အင်ဂျင်ဝိုင် ချက်နပ် (Oil Drain Plug)
- အင်ဂျင်ဝိုင် ကရိုင်းကစ် (Oil Pan)
- ဟက် ဂဏ်စကက် (Engine Head Gasket)
- PCV ဗား (Positive Crankcase Ventilation Valve)
၃။ အင်ဂျင်ဝိုင် အရည်အသွေးမပြည့်ခြင်းနှင့် SAE Grade လွဲမှားစွာအသုံးပြုခြင်း
အင်ဂျင်ဝိုင်တွင် SAE (အပူချိန်အလိုက် အင်ဂျင်ဝိုင်ဈေးပျစ်မှုသတ်မှတ်ချက်) နှင့် API (အင်ဂျင်ဝိုင် အရည်အသွေး သတ်မှတ်ချက်) ဟူ၍ ရှိပါသည်။ အင်ဂျင်အနေအထား၊ ကားအသုံးပြုရာနေရာဒေသ၏ အပူချိန်ပေါ်မူတည်၍ အင်ဂျင်ဝိုင် SAE Grade ကို ရွေးချယ်အသုံးပြုရပါတယ်။ ထို့အပြင် အင်ဂျင်ဝိုင် အရည်သွေးသတ်မှတ်ချက်ဖြစ်သည့် API အဆင့်သတ်မှတ်ချက်ကိုလည်း အထူးဂရုစိုက်ရပါမယ်။ DPF (Diesel Particulate Filter) ပါသော ဒီဇယ်အင်ဂျင်များနှင့် Catalytic Converter (ကျောက်ဇကာ) ပါသောကားများ (ကားအားလုံးနီးပါးတွင် အသုံးပြု) တွင် အရည်သွေးနိမ့်သော အင်ဂျင်ဝိုင်ကို အသုံးပြုပါ အင်ဂျင်ဝိုင်ပျောက်ခြင်း၊ DPF နှင့် Catalytic Converter များ လျှင်မြန်စွာ ပျက်စီးနိူင်ပါတယ်။
၄။ အင်ဂျင်ဒီဇိုင်းအရ အနည်းငယ်လျော့ခြင်း
တစ်ချို့သော ကားထုတ်လုပ်သည့် ကုမ္ပဏီများသည် အင်ဂျင်ဒီဇိုင်းသဘောအရ အင်ဂျင်ဝိုင်အနည်းငယ်စားပါတယ်။ အဆိုပါကားများ၏ ပိုင်ရှင်လက်စွဲစာအုပ် (Owner Manual) တွင် ကီလိုမီတာ (သို့) မိုင် ဘယ်လောက်မောင်းပြီးပါက အင်ဂျင်ဝိုင်ပမာဏ ဘယ်လောက်ရော့မည်ဆိုသည် ထည့်ရေးထားပါတယ်။ အဆိုပါကားများတွင် အင်ဂျင်ဝိုင်လျော့ပါက သတ်မှတ်ချက်ပမာဏအတိုင်း ဟုတ်မဟုတ် သေချာစွာစစ်ဆေးပေးသင့်ပါတယ်။
ဥပမာ - 2006 Lexus RX330 ၏ ကားပိုင်ရှင်လက်ဆွဲစာအုပ်တွင် အင်ဂျင်ဝိုင်စားနှုန်း (Max Oil Consumption) - (1 Liter per 1000 km) ၁၀၀၀ ကီလိုမီတာမောင်းပြီးပါက အများဆုံး အင်ဂျင်ဝိုင် ၁လီတာလျော့နိူင်ဟု ရေးသားထားပါသည်။ ၎င်းပမာဏ လျော့ပါက ယိုစိမ့်မှုကြောင့်၊ အင်ဂျင်ဝိုင် မကောင်းတာကြောင့်ဟု ပြော၍ မရနိူင်ပါဘူး။
