26/05/2026
◾️စမတ်ကတ် ပျောက်ဆုံး၊ ပျက်စီးပါက Biometric ဖြင့် ပြန်လည်ထုတ်ယူနိုင်
စမတ်ကတ် (UID) ပျောက်ဆုံးခြင်း သို့မဟုတ် ပျက်စီးမှုများ ဖြစ်ပေါ်လာပါက နီးစပ်ရာ လူဝင်မှုကြီးကြပ်ရေး မြို့နယ်ဦးစီးမှူးရုံးများတွင်ကိုယ်တိုင်သွားရောက်၍ Biometric စနစ်ဖြင့်ပြန်လည်ထုတ်ယူနိုင်ကြောင်း လူဝင်မှု ကြီးကြပ်ရေးနှင့် ပြည်သူ့အင်အားဝန်ကြီးဌာနက မေ ၂၂ ရက်တွင်ထုတ်ပြန်ခဲ့သည်။
ထုတ်ပြန်ချက်အရ စမတ်ကတ် ပြန်လည်ထုတ်ပေးရာတွင် ကာယကံရှင်၏ အမှန်တကယ်ပိုင်ဆိုင်သူဖြစ်ကြောင်း အတည်ပြုနိုင်ရန်အတွက် မြို့နယ်ရုံးများရှိ Biometric Enrollment and Verification စနစ်ကို အသုံးပြု မည်ဖြစ်ကြောင်းသိရသည်။
အဆိုပါစနစ်တွင် မျက်နှာ၊ လက်ဗွေ၊ မျက်စိသူငယ်အိမ် စသည့် ဇီ၀အချက်အလက်များကို e-ID စနစ်အတွင်းရှိ မူလဒေတာများနှင့် တိုက်ဆိုင် စစ်ဆေးပြီးမှသာ စမတ်ကတ်အသစ် ပြန်လည်ထုတ်ပေးမည် ဖြစ်သည်။
ထို့ပြင် ပွဲစားများနှင့် ကြားခံလူများမှတစ်ဆင့် ဆောင်ရွက်ခြင်းသည် အချိန်နှင့် ငွေကြေးကုန်ကျမှုများ ဖြစ်ပေါ်စေနိုင်သလို UID အတုအပနှင့် လုံခြုံရေးဆိုင်ရာ ပြဿနာများ ဖြစ်ပေါ်နိုင်သဖြင့်ကာယကံရှင်ကိုယ်တိုင် လာရောက် ဆောင်ရွက်ရန်အရေးကြီးကြောင်း လည်း ဝန်ကြီးဌာနက သတိပေးထားသည်။
e-ID စနစ်ဖြင့် အတည်ပြုပြီးနောက် UIDစမတ်ကတ်အသစ်ကိုလည်း ကြားခံမပါဘဲကာယကံရှင်၏ လက်ဝယ်သို့ တိုက်ရိုက်ထုတ်ပေးမည်ဖြစ်ကြောင်း သိရသည်။
သတင်း-ဆုလဲ့
ဓာတ်ပုံ-MOI
#ယနေ့ထုတ်သတင်းစာ_ပြည်တွင်းသတင်း
#အော်တိုမြန်မာ
