ព្រោះតែស្រលាញ់

27/03/2016

26/03/2016

🇰🇭🇰🇭🇰🇭🇰🇭🇰🇭🇰🇭🇰🇭🇰🇭

25/03/2016

...ស្រីមានលក្ខណ៍... កវី កំសត់ ០៣.០៦.២០១៥
បទពាក្យ៩ជាប់ទង
សរសេរបានត្រួសៗទេ នៅមានច្រើនចំណុចទៀត

ស្រីបវរ សចរិត ដ្បិតមារយាទ
ចេះឈ្លកឆ្លៀត ជាតិជាស្រី ស្តីរម្យទម
មិនអេចអូច ខូចនិយាយ ងាយជុំនំ
រឿងតូចធំ ជុំដើមគេ រេមិនឈប់។
ចេះគួរសម ខំចិត្តកាយ ម្តាយឪពុក
ពេលឃើញមុខ ទុកដាក់ចិត្ត ស្និទ្ធគោរព
ប្រត្តិបត្ត ហាត់លត់ដំ ខំឲ្យស៊ុប
ត្រូវគោរព យប់និងថ្ងៃ ដៃសំពះ។
មួយវិញទៀត ឆ្លៀតមិនប្រែ ថែទ្រព្យធន
ទ្រព្យក្រោយមុន ធន់រក្សា ការក្នុងផ្ទះ
ឲ្យគង់វង្ស ទ្រង់សមសួន ខ្លួនរូតរះ
ថែទ្រព្យផ្ទះ ឈ្នះវិនាស ចៀសបាត់បង់។
ពេលនាងដើរ ថើរថ្នមៗ តមក្តុងក្តាំង
មិនឲ្យខ្លាំង តាំងឲ្យស្ងាត់ បាត់ឮថ្លង់
ដើរឲ្យចំ សមជាស្រី ល្បីត្រចង់
ឫកផូរផង់ ចង់រាប់អាន ថ្កានថ្លាថ្លៃ។
មានស្នេហ៍ស្មោះ អស់ពីចិត្ត ស្និទ្ធស្វាមី
មានភក្តី ស្រីមិនប្រែ បែរដោះដៃ
ចាកចោលស្នេហ៍ ថែថ្នមថ្នាក់ ស្ម័គ្ររាល់ថ្ងៃ
ស្រស់ចរណៃ ថ្លៃថ្លើមចិត្ត ដិតស្នេហា។
មិនប្រចណ្ឌ កាន់ចិត្តស្អប់ ថប់អារម្មណ៍
មានឫកហំ សមភក្តី ស្រីលក្ខណា
មានចិត្តធ្ងន់ ទន់មារយាទ ឆ្លៀតកិច្ចការ
មិនវាចា ហាដាក់ប្តី ស្តីអើអញ។
ចេះរៀបចំ សម្បែងផ្ទះ ឈ្នះចង្រៃ
រាល់យប់ថ្ងៃ ដៃរហ័ស ច្បាស់មិនចាញ់
មានរៀបរយ ញយញឹកញ៉ាប់ គាប់ស្រឡាញ់
គួរឲ្យក្នាញ់ ក្នាញ់ខ្លាំងណាស់ ច្បាស់ស្រីល្អ។
មិនទម្លាប់ ធ្លាប់អង្គុយ ងុយងោកទៅ
ដល់យប់ជ្រៅ នៅផ្ទះគេ ជ្រេរមិនល្អ
មានការអ្វី ស្រីរូតរះ ផ្ទះបវរ
ធ្វើបន្ត បរទៅទៀត ឆ្លៀតផ្ទះខ្លួន។
ប៉ិនប្រសព្វ កប់ដុតអាំង តាំងពីនាយ
ស្លងាយៗ លាយកកូរ ប្តូរចៀនចួន
ឆាស្ងោរញាំ ស៊ាំធ្វើបាន ថ្កានខ្ជាប់ខ្ជួន
ស្រស់ស្រីស្ងួន ថួនចំណាប់ ច្បាប់ជាស្រី៕

25/03/2016

ប្រឹង! ទើបជា...
បទមេបួន (ប្រើសម្ផស្សពាក្យ)..................

ប្រឹងរកទើបបាន
ប្រឹងរៀនទើបចេះ
ប្រឹងដុតទើបឆេះ
ប្រឹងរះទើបភ្លឺ។

ប្រឹងទៅទើបដល់
ប្រឹងស្ដាប់ទើបឮ
ប្រឹងជាក់ទើបគឺ
ប្រឹងធ្វើទើបហើយ ។

ប្រឹងដេកទើបលក់
ប្រឹងបក់ទើបល្ហើយ
ប្រឹងថែទើបស្បើយ
ប្រឹងផ្ងើយទើបខ្ពស់។

ប្រឹងដាំទើបដុះ
ប្រឹងក្រាបទើបញាស់
ប្រឹងស៊ីទើបរស់
ប្រឹងហោះទើបឡើង។

ប្រឹងចោះទើបធ្លុះ
ប្រឹងគាស់ទើបប៉ើង
ប្រឹងល្អទើបថ្កើង
ប្រឹងពើងទើបក្លា ។

ប្រឹងគិតទើបយល់
ប្រឹងស្គាល់ទើបសារ
ប្រឹងច្រោះទើបថ្លា
ប្រឹងរាទើបជាប់ ។

ប្រឹងពត់ទើបត្រង់
ប្រឹងត្រូវទើបគាប់
ប្រឹងតទើបភ្ជាប់
ប្រឹងរាប់ទើបចាំ ។................
រ័ត្នន៍ សេនា