21/06/2026
මම හිතුවේ මේ මහා හුදකලාව මගේ හිතේ තිබ්බ නොසන්සුන්කම (Anxiety) සුව කරයි කියලා. ඇමරිකාවේ මේන් වෙරළට සැතපුම් 50ක් ඈතින්, මහා සාගරය මැද පිහිටි "බ්ලැක්වුඩ් රීෆ්" ප්රදීපාගාරයේ මාසයක කාලයක් තනිවම සේවය කරන්න මට ලැබුණේ ලොකු වැටුපක් තියෙන කොන්ත්රාත්තුවක්. හැබැයි ඉන්ටර්නෙට් නෑ, මිනිස්සු නෑ, මුහුදේ සද්දේ විතරයි.
නමුත් මට වැරදුණා. මේ මුහුද මිනිස්සුන්ව සනසවන්නේ නෑ. ඒ වෙනුවට ඒක මට රහස් කියවන්න ගත්තා... මම අහන්න අකමැති බියකරු රහස්.
සැපයුම් හෙලිකොප්ටරයෙන් මම මෙතනට බහිනකොට කවුරුත් හිටියේ නෑ. මුළු ප්රදීපාගාරයම මළානික නිශ්ශබ්දතාවයක ගිලිලා තිබුණා. ඇතුලු කුස්සියේ මේසය උඩ පරණ සම් කවරයකින් ඔතපු පොතක් තිබුණා. ඒක මෙතන කලින් හිටපු භාරකරු වෙච්ච "එලියාස්" තියලා ගිය එකක්. ඒකේ පළවෙනි පිටුවේ මෙහෙම ලියලා තිබ්බා:
*"මේ නීති ටික හරියටම පිළිපදින්න, එතකොට උඹට උඹේ පඩිය අරන් පණපිටින් ගෙදර යන්න පුළුවන් වෙයි."*
මුලින්ම මම හිතුවේ නාකි එලියාස් මාව බය කරන්න හදපු බොරුවක් කියලා. හැබැයි පළවෙනි රාත්රියෙන් පස්සේ මට තේරුණා, මේ ප්රදීපාගාරය තියෙන්නේ නැව්වලට පාර පෙන්වන්න නෙමෙයි... මහා සාගරයේ ඉන්න *වෙනත් මොකක් හරි බලවේගයක්* ගොඩබිමට එන එක නවත්වන්න කියලා.
ඉතින් මට හිතුනා ඒ නීති ටික ඔයාලා එක්ක බෙදා ගන්න
🟢 **බ්ලැක්වුඩ් රීෆ් ප්රදීපාගාර භාරකරු සඳහා වන නීති මාලාව**
**නීතිය 1:**
ප්රදීපාගාරයේ ඇති පිත්තල ඔරලෝසුව කිසිවිටෙකත් නතර වීමට ඉඩ නොදෙන්න. සෑම දිනකම දහවල් 12:00 ට සහ මධ්යම රාත්රී 12:00 ට හරියටම එය යතුරෙන් ක්රියාත්මක කරන්න (Wind කරන්න). ඔරලෝසුව නතර වුවහොත්, ප්රදීපාගාරයේ කාලය වෙනස් වේ.එවිට ඔබට එලියාස්ව පෙනෙනු ඇත. ඔහු සමඟ කිසිවිටෙකත් කතා නොකරන්න; ඔහු දැන් පැරණි එලියාස් නොවේ.
**නීතිය 2:**
හිරු බැස ගිය සැණින්, පහළ මාලයේ ඇති බරැති යකඩ දොරවල් සියල්ල අගුළු දමන්න. ඔබට දොරවල්වලට යමෙකු සූරන හඬ ඇසෙනු ඇත. ඒ මීයන් නොවේ. කිසිදු හේතුවක් නිසා, දොරේ යතුරු හිලෙන් පිටත බලන්නට උත්සාහ නොකරන්න.
**නීතිය 3:**
මීදුම නලාව (Foghorn) සැමවිටම සූදානම්ව තබා ගන්න. ඝන මීදුමක් පැතිරෙන විට, සෑම විනාඩි දෙකකට වරක්ම නලාව නාද කරන්න. කිසිදු නැවක් හෝ ගොඩබිමක් නොමැති දෙසකින්, ඔබේ නලාවට පිළිතුරු ලෙස වෙනත් මීදුම නලාවක හඬක් ඇසුණහොත්, වහාම ඔබේ නලාව නාද කිරීම නවතා ඇතුළත ඇති සියලුම විදුලි ලාම්පු නිවා දමන්න. මීදුම පහව යනතුරු සම්පූර්ණ නිශ්ශබ්දතාවයෙන් රැඳී සිටින්න.
**නීතිය 4:**
මහා වඩදිය එන අවස්ථාවලදී, විනාඩි 30ක කාලයක් පුරා මුහුදු වතුර ප්රදීපාගාරයේ පාදම සම්පූර්ණයෙන්ම වසා දමන තරමට ඉහළ යයි. ඒ කාලය තුළ ඔබ ඉහළම මාලයේ ඇති ප්රදීප කාමරයට (Lantern room) වී සිටිය යුතුය. මුළු කුළුණම වෙව්ලන බව ඔබට දැනෙනු ඇත. ඒ රළ පහර නිසා නොවේ; මහා සාගරයේ වෙසෙන එක් සත්වයෙකු ප්රදීපාගාරයේ පාදමට පහරදෙන බැවිනි. පහළ නොබලන්න.
**නීතිය 5:**
ප්රදීපාගාර සීමාවෙන් සැතපුමක් ඇතුළත අල්ලන කිසිදු මාළු වර්ගයක් ආහාරයට නොගන්න. කුණාටුවකට පසු, ප්රදීපාගාරයේ බැල්කනියේ තිබී සුදුමැලි, කළු ඇස් ඇති අමුතු මසුන් හමුවුවහොත්, කිසිවිටෙකත් උන්ව හිස් දෑතින් අල්ලන්න එපා. සවලක් ආධාරයෙන් උන්ව නැවත මුහුදට දමා, මුහුද දෙස බලා ශබ්ද නඟා සමාව ඉල්ලන්න.
**නීතිය 6:**
ප්රදීපාගාරයේ ඇති කැරකෙන පඩිපෙළෙහි දවාලට ඇත්තේ පඩි 114කි. රාත්රියේදී පඩිපෙළ බසින විට ඔබට පඩි 115ක් හමුවුවහොත්, වහාම නවතින්න. ආපසු හැරී පසුපස නොබලා උඩටම යන්න. පසුදා හිරු උදාවන තුරු නැවත පහළ මාලයට නොයන්න.
⛔ **නීතිය 7:
(අතිශය වැදගත්)**
**සෑම රාත්රියකම හරියටම පෙ.ව. 2:13 ට ප්රදීපයේ ආලෝක ධාරාව පිහිටා ඇති දිශාව පරීක්ෂා කරන්න. යම් හෙයකින් ආලෝකය මුහුද දෙසට නොව, ගොඩබිම දෙසට හැරී තිබෙනු දුටුවහොත්, එම සැණින් ඔබේ ඇස් තදින් වසාගන්න. ඇස් වැසීමට දෑත් පාවිච්චි නොකරන්න; ඇස් පිහාටු පමණක් තද කරගන්න. ඒ ගැන ප්රශ්න කරන්න සහ කුතුහලෙන් ක්රියා කරන්න යන්න එපා.ඒක ඔබට අදාල රාජකාරියක් නොවන බව සිහිතබාගෙන ඉන්න.
**නීතිය 8:**
කුණාටු සහිත රාත්රියක, ඔබේ මව හෝ ඔබ ආදරය කරන කෙනෙකු බැල්කනියේ සිට උදව් ඉල්ලා කෑගසන හඬ ඇසුණහොත්, කිසිසේත්ම දොර නොහරින්න. ඔබ සිටින්නේ ගොඩබිමෙන් සැතපුම් 50ක් ඈත මුහුදකය. ඔවුන් මෙහි සිටිය නොහැක.
**නීතිය 9:**
රාත්රියේදී ප්රදීප කාමරයේ වීදුරුවලින් පෙනෙන ඔබේ ප්රතිබිම්බය සැමවිටම ඔබ නොවේ. ඔබ නොසිනාසෙන විට වීදුරුවේ ඉන්නා ඔබේ ප්රතිබිම්බය සිනසෙන්නේ නම්, හෝ ඔබගෙන් වෙන්ව වෙනත් චලනයන් කරන්නේ නම්, වහාම වීදුරුවෙන් ඉවතට හැරී, ප්රතිබිම්බය යථා තත්ත්වයට පත්වන තෙක් "නීතිය 1" සිහි තබා ගන්න.
**නීතිය 10:**
ඔබේ කොන්ත්රාත්තුවේ අවසාන රාත්රියේදී කිසිසේත්ම නින්දට නොයන්න. ප්රදීපාගාරයේ වෙසෙන උන් ඔබ මෙතැනින් යන බව දනී. එය ඔබව මෙහි නතර කර ගැනීමට හෝ ඔබවද මේ මුහුදේම කොටසක් කර ගැනීමට උපරිම උත්සාහ කරනු ඇත. ආලෝකය මුහුද දෙසටම තබා ගන්න. ඔබේ දෑස් ක්ෂිතිජය දෙසටම යොමු කරගෙන සිටින්න.
ඒත් මම මගේ කුතුහලයට වෛර කරනවා
අවාසනාවකට මම මම එලියාස්ගේ අනතුරු ඇඟවීම් ගැන වැඩිය තැකුවේ නැහැ.
දැන් වෙලාව පාන්දර 2:12යි. මම ඉන්නේ උඩම මාලේ.
මුළු කාමරයම අයිස් වගේ සීතල වෙලා, පරණ කුණු වුණු මස් ගඳක් මුළු පළාතේම පැතිරෙනවා.
ප්රදීපාගාරයේ යන්ත්ර සූත්ර ක්රියාත්මක වන සද්දේ ඇහෙනවා. ඒක කැරකෙනවා... ආලෝකය කළු මුහුදෙන් ඉවතට හැරෙනවා.
දැන් ඒ මහා ආලෝක ධාරාව කෙළින්ම එල්ල වෙලා තියෙන්නේ ගොඩබිමේ තියෙන මගේ ගම පැත්තට.
මගේ ඇස් දැවිල්ල ගන්නවා. මට ඇස් වහගන්න වෙනවා. ඒත් මට බලන්න ඕනි. පිටත ඉන්නේ කවුද කියලා මට බලන්නම ඕනි...
පොඩි කොල කෑල්ලක මම ලියපු පනිවිඩය මගේ උඩ සාක්කුවේ සුරක්ෂිත තියෙයි කියලා මට විස්වාසයි.
"කරුණාකරලා වෙරළ අයිනේ ඉන්න මිනිස්සුන්ට අනතුරු අඟවන්න. " ඒකට අහුවෙන්න එපා..ඒක උගුලක්..."
ශැගී....✍️
