曼徹斯特明記汽車保養維修 Ming Mechanics Manchester

15/09/2022

01/09/2022

[個案分享]早前收到一位客人嘅急call， 佢發現佢架Nissan Juke每次著車，車底都會不斷有不明液體流出，懷疑係漏水箱水或偈油。

喺我地到場檢查後發現漏出嚟嘅竟然係CVT 波箱油。呢款Nissan Juke 嘅CVT 波箱油喺著車後理應係經密封嘅油路去到Oil Cooler進行冷卻， 但由於位於頭bumper 嘅油喉接駁位置經過長年累月嘅路面上嘅鹽份嘅侵蝕，已經斷開左9成，導致波箱油直接從裂縫中滲漏。保守估計波箱內嘅波箱油只剩下兩成，任何嘅駕駛都會令波箱嚴重受損。

由於英國嘅cvt 版嘅juke 比例較少，英國本土係完全無呢條油喉嘅存貨，市面上嘅劏車件不但比全新件貴，鏽蝕嘅狀況亦同樣嚴重，無法使用。喺別無選擇嘅情況下，我地從外國訂購全新油喉後隨即為車主進行維修，成功喺最短嘅時間將客人嘅代步工具修理好。

英國嘅氣候同路面狀況同香港截然不同，冬天路面上嘅鹽分會令車底及車頭外露嘅含鐵嘅金屬零件生鏽，唯一嘅方法係定期檢查及進行防鏽保護。當然，防鏽亦不能100% 保護零件避免生鏽，但能夠降低金屬喉管及零件老化嘅速度，減低因生鏽而衍生嘅高昂維修費用。

24/07/2022

[汽車保養篇 Ep.1 偈油波箱油篇]

相信唔少新手車主都會有關於汽車保養嘅以下嘅疑問，「究竟我買左架車返嚟應該要換啲乜野?」、「咩係五油三水?」、「隔幾耐要換一次消耗品?」、「消耗品究竟包括啲乜?」等等。呢個系列會將大家嘅問題一一解答，希望幫到大家。

「五油三水」係香港老一輩師傅會用到嘅術語，係一般汽車保養最基本嘅一環，「五油」分別係引擎機油 (偈油)、煞車油、波箱油、風油軚油、汽油；而「三水」代表水箱水、電池水、水撥水，喺以上嘅術語入面，電池水係近十幾年嘅車入面已經甚少出現，而風油軚油就不適合於現今使用電軚嘅車款。

以下會講解現今車主需要注意更換的其中兩種基礎消耗品:
1.引擎機油(偈油)+ 油隔: 偈油係引擎嘅潤滑油，有降低引擎零件磨損、延長引擎壽命、清潔、防鏽、冷卻、保持氣缸密封等功能，因此定期嘅更換對引擎嘅健康好重要。至於幾耐要換一次，好多人話睇哩數就得，但事實係要視乎你用車嘅習慣同車嘅年份。

a) 如果你好少揸架車出街或者只行短程不行高速(少於10 miles each) ，最好就半年換一次，因為係少揸嘅情況下偈油老化嘅速度會較快。

b) 如果你架車有返咁上下新 (7年) ，無論你點用車，最佳嘅換油間隔都係每約3100 英里一次，以延長引擎的壽命。

2. 波箱油 (自動油/ 棍波)，係波箱齒輪嘅潤滑油，亦係一種可以清潔波箱的產品，而波箱油品質好壞會直接影響變速器的性能，長期不更換會令金屬粉末積聚造成頓挫，更有機會損壞波箱齒輪。自動波車嘅波箱油同棍波用嘅波箱油係完全唔同成份嘅液體嚟，要做嘅保養亦唔同。

a) 棍波波箱油一般建議每30000英里至50000英里換一次，如果你揸車嘅習慣係長期地激烈駕駛，建議就10000至20000英里更換一次。由於棍波結構比較簡單，因此保養成本亦較便宜。

b) 自動波波箱油: 部分波箱廠堅持佢地嘅波箱係Lifetime唔需要換油，我地唔知佢地設計師心目中嘅”Lifetime” 有幾長，但所有自動波波箱油喺一般城市環境、負荷大(拉trailer) 嘅情況下係會因為波箱嘅高溫老化得更快，老化左嘅波箱油係會更「杰」身，令轉波唔順暢，出現頓挫。一般自動波波箱油嘅更換周期為55000至75000 英里，定期更換先可以延長波箱嘅壽命，視乎車款，部分自動波箱需要在換波箱油時一拼更換油隔及油底。

由於怕太長無人睇，下一期會再講解其他消耗品嘅更換周期，大家有咩想知可以問。

17/07/2022

［個案分享］昨日中午收到一位客人求助，佢今朝出車揸左五分鐘就發現架車車頭出煙，明哥喺緊急上門檢查後發現架車嘅哇佬冚箏口（Valve Cover Gasket) 燒左同引擊倉後面嘅一個膠面嘅金屬塞 (Camshaft frost plug)成個唔見左，導致機油從引擎油路直接噴射落死氣蕉 (exhaust manifold)上，機油繼而喺高溫嘅嘅死氣蕉上面燃燒而令車頭冒煙。喺確定Crankcase pressure 是否正常後，成功在三小時內為客人的座駕購買新零件及重新安裝Valve Cover Gasket同唔見左嘅Camshaft frost plug，漏油問題解決。

相信唔少車主都聽過歐洲車成日漏油而日本車唔識壞嘅講法，其實係造車理念嘅差別。以德國車同日本車為例：日本車追求耐用；德國車追求性能。日本車所用機器的氣缸表面比德國車光滑，久而久之會因為缸壁磨損而損失部分馬力，但因為日本車機器設計上使用的密封設計比德國車耐用，所以漏油嘅情況會比較少出現；而德國車的氣缸表面相對不平滑，換言之更多的機油可以依附在表面帶嚟更好嘅潤滑效果，而因保護性較好，德國車在長期使用後馬力流失會較少。根據部分德國車嘅設計，活塞刮唔走嘅機油會在氣缸入面燃燒埋，所以有部分歐洲車新車都會叫你定期top up 機油。德國車比日本車更常漏油唔係無理據嘅，一來歐洲車比日本車喺機器密封技術上使用嘅膠件比較多，膠件喺長期高溫使用後會自然老化；二來德國車重視性能的設計，引擎內的壓力一般比一般日本車較高，對密封部分的零件負荷自然較大，漏油機會自然高啲。

的而且確歐洲車機器上的保養要求比日本車更高，但絕對唔係買唔過。其實只要做足保養同定期檢查，歐洲車絕對可以同日本車一樣咁襟揸 !

22/06/2022

明記提供專業汽車維修保養服務、故障診斷維修、及免費英國買車網上一對一諮詢服務。主理人明哥在港擁有超過三十年中小型汽車維修經驗。歡迎以Whatsapp、Facebook Inbox、instagram 電郵查詢報價及預約。

知悉不少在英港人車主原本沒有擁有汽車的經驗，各位如有任何關於汽車保養的問題，可inbox 查詢，定當盡力解答。

Ming Mechanics is a VAT registrated onsite vehicle maintenance and repair services provider. We also provide fault analysis, and interior detailing in the Northwest England. Our Chief Mechanics have had more than 30 years experiences in vehicles repair and servicing. We provide service to anyone who need a vehicle inspection, services, and repair. Don't hesitate and request for a quote and book our services via Whatsapp, Signal, and Email and get your car serviced and fixed today!

#曼徹斯特香港人整車 #曼市港人整車 #英國整車 #英國明哥整車 #曼市明哥 #曼市整車 #曼徹斯特明哥 #明記汽車保養維修 #曼徹斯特明記汽車保養維修 #英國買車 #曼城整車 #曼城車主 #利物浦整車 #英國上門整車 #曼市車房 #英國車房