16/08/2023
من سنتين تقريباً طلعت مع ناس صحابى رحله فى العين السخنه واحنا راجعين ماتفهمش بقى ايه الى حصل تهنا رغم اننا كنا ٦ عربيات ماشيه ورا بعض و أولنا رؤوف ده ظابط فى السويس ياعنى حافظ الطريق صم..
وبعد مامشينا كتير اكتشفنا اننا بالفعل فى السويس بدل الرجوع للقاهره ولأن زوجه رؤوف كانت حامل طلبت انها ترتاح شويه قبل بدء رحله العوده للقاهره..
وقعدنا وريحنا و إحنا قاعدين لقينا عربيه ماشيه محملة بخيرات الله من أسماك كتيره أوى والراجل عمال ينادى فى ميكرفون العربيه انه عنده أحلى أنواع السمك وسمك طازه لسه طالع من البحر ، قلت مااقوم اتفرج ..
وفعلا كان سمك طازة وممتاز ، و اشترينا ال ٦ عائلات كل السمك الى كان معاه لدرجة إن الراجل عربيته فضيت ..
وكانت محصلة الي دفعناه إحنا ال 6 أسر ١١ الف جنيه دفعناهم كلنا فى السمك والجمبري الي كان معاه ..
الراجل مابقاش مصدق نفسه من الفرحه وجرى يكلم حد فى التليفون ويقوله خلاص ال ١٢ الف جم ال ١٢ الف جم..
انا الحقيقه ماعرفتش الراجل كان محتاج الفلوس ف ايه بس الفرحه الى فى عنيه ورعشة ايديه كانت كافيه أنى اعرف ان ربنا سخرنا وتوهنا وجابنا من الشرق للغرب علشان رزق الراجل ده..
ومن ساعتها بقت قناعه ثابته عندى أنى يوم ما اتوه فى طريق انا عارفاه كويس وحفظاه يبقى اكيد ربنا بيسخرنى لحد..
وبالفعل امبارح كنت راجعه مع زملائى من الشغل وكنا ع الدائرى عادى الى كل يوم بنمشى عليه كلنا وكنت هاموت على رز باللبن وعماله اقولهم نروح المنيل نجيب من المالكى..
وحصل الى كنت متوقعاه فجأه إديت إشارة يمين ونزلت من على الدائرى و ماعرفش حصل ده إزاى ، أنا حسيت فجأه بتشويش ذهنى والكل قعد يقولى ايه النزله ديه!!
وانا مخى مشوش مش عارفه أركز وبعدين بقولهم احنا توهنا صح ، قالولى اه قلتلهم طيب يبقى كده احنا مبعوتين لرزق حد وغالباً هايكون محل رز ولبن زى المالكى. .
و بالفعل مكملناش الجملة ولقيناه فى وشنا!!
محل اسمه قشطة في شارع اللبينى زيه زى المالكى بالظبط ، و نزلنا واشترينا منه حاجات كتير جداً ..
اول ما دخلت المحل لقيت صاحب المحل قاعد فاتح المصحف وبيقرأ فيه ونفس الفرحة شوفتها فى عينه وانا بديله الفلوس الى اشترينا بيها الحاجه ، وكان السؤال الى بيدور فى بالى حكي ايه لربنا خلاه يجرنا جر لحد عنده؟! ..
من ساعة الموقفين دول وأنا بقي جوايا ( طمأنينة ) ، بقت لما تحصل أزمة عندي والدنيا تضيق أخد بالأسباب فقط ومادورش ع النتائج لأني آمنت إن النتائج مش بتاعتنا ، دورنا بينتهي لما ناخد بالأسباب ونتوكل علي الله ..
اتوكلوا ع الله حُسن توكله ، ومن حُسن التوكل إنك تاخد بالأسباب أوي وتبقي مطمن لأن النتائج بإيد الله وكونوا ع ثقة ( أنا عند ظن عبدي بي )
فا خدوا بالأسباب...وظنوا الخير
وكونوا مطمئنين ..
منقول..
