Ahmed Ammar ME - أحمد عمار

05/10/2026

مفاجئة جديدة من بي ام دبليو مصر ! فئة خامسة بسعر أفضل !

بعد بكرة الشركة هتعلن عن نسخة جديدة بتجهيزات مختلفة من الفئة الخامسة “520”

نسخة سعرها هيبقى "أحسن" وهيبقى منافس للنسخ الجديدة من مرسيدس E-CLass

مع العلم ان اول نسخة في التجهيز من الفئة الخامسة “520 Luxury” سعرها ٤.٥ مليون جنيه

ومعاها عقد صيانة مجانية مهم لمدة ٣ سنين او ٦٠ الف كم

اما مرسيدس E200 Avantgarde فسعرها ٤.٤٢٠ مليون جنيه

يعني عربية مرسيدس سعرها اقل ب ٧٠ الف جنيه بس معهاش عقد الصيانة اللي يسوى طبعا فلوس كتير "مش اقل من ١٠٠ الف جنيه باي حال من الاحوال " !

بي ام دبليو 520 بتيجي بمحرك ١.٦ لتر تربو Mild hybrid بقوة ١٩٠ حصان مع ٣١٠ نيوتن متر

اما مرسيدس E200 فمحركها اكبر بسعة ٢.٠ لتر تربو بس بقوة مش بعيدة تساوي ٢٠٤ حصان مع ٣٢٠ نيوتن متر للعزم

اعتقد فرق السعة اللترية هيفرق في الترخيص لصالح بي ام دبليو

المهم

تتوقعوا سعر النسخة الجديدة من الفئة الخامسة هيبقى كام ؟!

أنا أتوقع ٤.٣ مليون مع عقد الصيانة !

ها توقعاتكم ايه ؟!

04/10/2026

عملنا أطول رحلة بالعالم بدون إغلاق المحرك

أكتر من ٥٤ ساعة متواصلة ….

٤٤٧٨ كم بالظبط….

قيادة متواصلة ….حتى البنزين ….حطيناه واحنا مدورين العربية

٣ فرق بتبدل في السفر من القاهرة والأقصر !

في عز الحر ! عملناه في شهر اغسطس

رايح جاي ….رايح جاي ….رايح جاي 😃

كتير لغاية لما هلكنا !

ليه عملنا كدة ؟!

علشان نتحدى نيسان ماجنيت ونختبر محركها ال سلندر اللي عامل قلق والناس مش فاهماه وعمالة تهاجمه على الفاضي والمليان

لما قلنا لنيسان على التحدي …. قالوا يالا احنا جاهزين ! العربية بقالها ٣ سنين في جنوب افريقيا وماشية زي الفل !

تحدي مش سهل

كان في حاجات كتير كانت ممكن تحصل

درجة حرارة المحرك كانت ممكن تزيد

الفتيس كان ممكن يسخن ويبدأ ينتش

شاشة النظام المعلوماتي كانت ممكن تسخن وتقف تماما

الكاوتش ….ياه على الكاوتش والخوف من الكاوتش

التجربة كانت صعبة بس اللي حلاها ان كان معانا أحمد نوح الجميل

العربية كشفنا عليها بعد التجربة في مصنع نيسان بعد التجربة والنتيجة كانت ممتازة !

فيديو التجربة فيه تفاصيل كتير …..ساعة كاملة بعد الاختصار الكتييييييير !

اتمنى تشوفوا الفيديو وتقولولي رايكوا

اللينك في اول كومنت

وتشتركوا في الصفحة الجديدة لان الصفحة القديمة فيها مشاكل كتير

تحياتي واستنوا تحديات جديدة مختلفة من أوتو زوون !

11/08/2026

حد كان يتخيل …..ان عربية السوق المصري تبقى احسن من نسخة السوق السعودي ؟!

ده اللي هيجي في دماغك اول ما تشوف هيونداي فينيو ٢٠٢٧ الشكل الجديد …..اللي لسة نازلة السوق السعودي

جاية طبعا بشكل جديد ومختلف عن اللي هينزل السوق المصري كتصنيع محلي

وفيه منها نسخة N line شكلها رياضي

عربية من بعيد شكلها وتجهيزاتها احسن بكتير

ولكنها جاية بمحرك ٣ سلندر !

ايوة شفت الضحكة في عنيك 🤣 الموديل الجديد نازل في السعودية ٣ سلندر تربو ١٠٠٠ سي سي فقط

يعني نسخة مصر حتى لو قديمة ….ففيها محرك اكبر …١.٦ لتر …وبسحب طبيعي للهوا

مع جير بوكس اوتوماتيك من ٦ سرعات

العربية السعودي نازلة دويل كلاتش "ده ميزة من وجهة نظري"

فالسؤال بقى !!!

هما اللي صح ؟!!! ولا احنا اللي صح.؟!

ال ٣ سلندر التربو الجديد احسن ؟ ولا ال ١.٦ لتر ال ٤ سلندر القديم احسن ؟؟

عاوز اعرف رايكم

وسعر العربية السعودي ومواصفتها الكاملة في تقرير مجلة اوتو زوون في اول كومنت

10/08/2026

مين قال ان محركات ال ٣ سلندر ضعيفة ؟ او مش بتعيش ؟

تويوتا عاملين عربيتين "متوحشين" من فئة جي ار الرياضية

جي ار يارس و جي ار كورولا

فيهم اقوى محرك ٣ سلندر في العالم !

١٦٠٠ سي سي بيطلع ٢٩٦ حصان مع ٤٠٠ نيوتن متر

كان ممكن يعملوه ٤ سلندر ….بس تويوتا زي بي ام دبليو ….شايفين ان السعة المثلى لكل ٥٠٠ -٥٥٠ سي سي تبقى في سلندر واحد

علشان كدة عملوا محرك ٣ سلندر بالمواصفات دي

ولو هتقولي بيوفروا فلوس ….هقولك يصرفوا بحث وتطوير علشان يعملوا محرك جديد …ولا يطوروا اي محرك قديم ٤ سلندر عندهم ؟!

شوفوا تسارع ال٣ سلندر ده عامل ازاي !

24/01/2026

تتوقعوا تكون بكام لما تنزل السوق المصري بشكل رسمي ؟

23/01/2026

تسارع جبار لوحش أمريكي مملوك للإخوة في السعودية

16/09/2025

عربية بتسوق نفسها بنفسها بحق وحقيقي !

بتجيلك لغاية عندك من غير سواق !

ايه رأيكم

05/09/2025

مستقبل بي ام دبليو هيبان النهاردة !

يوم للتاريخ

مستقبل BMW و ٨٠٠ كم بالشحنة الواحدة !

النهاردة يوم تاريخي لعلامة BMW !

بحضر مؤتمر عالمي في ميونخ ….بدعوة من بي ام دبليو مصر ….في وسط ٣٠٠ صحفي من حوال العالم لحضور اليوم المهم ده !

النهاردة الكشف الرسمي عن اول موديل للإنتاج التجاري من فئة NEUE Klasse

سيارة الجيل الجديد لطرازات الشركة واللي هتأثر على اكتر من ٤٠ موديل هيتقمدوا حتى سنة ٢٠٢٧

طبعا NEUE Klasse هي "استراتيجية" ….بتضمن تصميمات ثورية جديدة ….محركات وبطاريات كهربائية بتقنيات جديدة …..أنظمة معلوماتية ثورية "تخض" ….بتشمل الجيل السادس من idrive …أنظمة شفتها في زيارة خاصة "سرية" في مركز أبحاث بي ام دبليو في ميونخ

العربية الجديدة هي “ix3” ….النسخة الكهربائية من X3"مش العربية اللي في الصورة "

وهي مش هتبقى شبه ال X3 اللي اتقدمت في مصر من كام يوم

حاجة تانية خالص

وللعلم

"المفروض" هتقدر تمشي حتى ٨٠٠ كم بالشحنة الواحدة ! وقدرة شحن ممتازة

طبعا الصورة دي مع وحش NEUE Klasse التجريبي بقوة تزيد عن ١٠٠٠ حصان

العربية الجديدة لسة الكشف عنها كمان ساعتين

تابعوني الستوريز على انستجرام !

اللي هتشوفوه في الستوريز ده مستقبل الشركة

29/08/2025

أكبر وافخم باب سيارة في التاريخ ! رولز رويس سبيكتر الخطيرة ! وفيه حاجات مش هتصدقها !

05/08/2025

خلاصة مميزات وعيوب سوايست S05 ….اللي بتتقدم في الخليج باسم جيتور X50

التفاصيل في فيديو التجربة التفصيلية على اليوتيوب